Shillong, Naiwieng 08: Da ka jingsngewkhia halor ka jingmad jingeh ki paidbah ka shnong Huroi, East Jaintia Hills, ban leit ban wan na kawei ka jaka sha kawei pat, ki shipai Border Security Force (BSF) ryngkat ka jingiatreilang bad ki bor pyniaid District kila pynshna da ka jingkieng siej da ka jingthmu ban pynsuk iaka leit ka wan jong u paidbah uba sah haka thaiñ khappud.
Ia katei ka jingkieng siej la plie hynne ka sngi, da u DIG, SHQ BSF Jowai u Sandeep Rawat bad u Deputy Commissioner jongka East Jaintia Hills u Abhilash Barnwal ha ryngkat ka jingdonlang u Sanjay Sharma uba long u Commandant jongka 172 Bn BSF bad kiwei kiwei.
Ki BSF kila pynpaw ba ki paidbah nongshong shnong ha katei ka thaiñ nongkyndong kila donkam la slem bha ia katei ka jingkieng ban pynsuk iaki haba ki leit sha kawei pat ka jaka bad ki paidbah nongshong shnong kila ai khublei bad sngewnguh iaka ka BSF kaba la pynshna ia katei jingkieng siej kaba don halor ka wahduid.
Ki paid nongshong shnong, kila kyrpad ruh iaka BSF ban shna shuh shuh ia kum kitei ki jingkieng siej ha kiwei pat ki jaka kiba don ka wahduid kaba heh naka bynta ka bha ka miat jong u nongleit nongwan ha ka thaiñ khappud.
Ka BSF kala pynpaw ba kan pyrshang ban pynioh iaka jingiarap na ki kynhun lyngba ka CSR Project bad kala ai jingmut ruh ba kan ialeh ban kyntiew ia ka thaiñ khappud na ka bynta ka bit ka biang jong ki paidbah.
