Shillong, Jymmang 24: Ka Khasi Hills Autonomous District Council (KHADC) hynne ka sngi Thohdieng, kala sam syrnod (Certificate) bad ID card shaki nongsumar dawai kynbat ka Ri-Lum Khasi.
Kane ka jingithuh ka KHADC ka pynkupbor iaki nongsumar tynrai ban nang pyntbit shuh shuh ialade bad haka juh ka por ban iai bteng ia ka rukom sumar tynrai jong u Khasi da kaba pyndonkam ia ki kynbat dawai.
Ha kane ka sngi, 24 ngut ki nongsumar dawai kynbat Khasi kila ioh iaka syrnod bad ID naka KHADC, ia kaba la ithuh kat kum ka KHADC (Protection and Promotion of Khasi Traditional Medicines) Act 2011.
Haba kren sha ki lad pathai khubor, u CEM ka KHADC Bah Pyniaid Sing Syiem ula ong ba kane ka jingai jingithuh iaki nong sumar tynrai kadei ban pynkupbor iaki ba kin kyntiew iaka rukom sumar tynrai Khasi.
U Bah Pyniaid ula ong baka Ri Khasi ka bun ki nongsumar tynrai hynrei ki don ruh kiba shu pynbud tynneng ia kiwei daka jingthmu ban shim kabu.
“Khlem ka jingai jingithuh, ki nongsumar tynrai Khasi kim da nud ban ai jingsumar hynrei mynta ki nongsumar kin ioh ka bor lyngba ka KHADC (Protection and Promotion of Khasi Traditional Medicines) Act 2011 ba kin sumar khlem da don ka mynsiem ba tieng” ong u Bah Pyniaid.
U Bah Pyniaid ula iathuh ba mynshwa ki don 33 ngut ki nongsumar Khasi kiba la ioh jingithuh bad mynta ka sngi ki don sa 24 ngut bad baroh ki nongsumar tynrai Khasi kiba la ioh jingithuh naka KHADC ki long 57 ngut.
“Nangne shakhmat ruh ka KHADC kan dang khot Application iaki nongsumar tynrai khnang ba kin ioh jingithuh naka District Council ban bteng iaka kam sumar tynrai kaba bun rukom” ula ong.
