Shillong, Aug 29: U Deputy Commissioner jong ka East Jaintia Hills District, u Abhilash Baranwal, hynne ka sngi Ba-ar ula pynpaw iaka jingbynniaw halor ka jingpynsaphriang ia ka khubor ka bym shisha lyngba ka Video ha kaba iadei bad ka jingjia ha ka National Highway-6 ha Wahiajer.
Ha katei ka video la kynnoh ba u Deputy Commissioner ula pyndonkam bakla iaka bor ka jong u pyrshah ia u nongniah jong ka kali pickup.
Ha ka kyrwoh khubor, u Baranwal ula ong, ba ia u nongniah jong katei ka kali la phah ban leh iaka Medical Test ha kaba la shem ba ula shoh khawiang bad um long uba bit ba biang ban niah kali ha katei ka por. Katei ka jingjia ka long ka bym lah ban mutdur ha kaba la pynsaphriang lyngba ka Video khlem kano kano ka jingshisha kaba la kynnoh pyrshah ia u.
U Deputy Commissioner u pyntip ba u don ha ka lynti ban leit sha Lumshnong ban iashimbynta ha ka Annual Day Celebration ha Divine Words Secondary School, Lumshnong bad ban lum iaka jingialang bad ka Project Director, DRDA, East Jaintia Hills District, Block Development Officer, Lumshnong C&RD Block bad baroh ki Gram Sevaks bad BTA jong katei ka Block.
Kala don ka jingdheng kali kaba jur haka surok bah naduh na Thangskai haduh Wahiajer namar ka jingdon bun tylli ki kali kiba sniew ha kylleng ki jaka.
U Deputy Commissioner ula ong, ba u nongniah iaka kali ka jongu ula ai ‘Signal’ ban ioh ban iaid shakhmat hynrei ula iakynduh ia kawei ka kali Mahindra Camper Pick up kaba don ia u nombar ML 11- 4554 kaba la ieng ha khmat.
“Hynrei haba ki kali kila iaid shakhmat bad la ai signal la bunsien da u nongniah u jong nga ban ailad iaka kali jong nga ban iaid shakhmat, atei ka kali kam shym la ailad satia. Namar ba u Personal Security Officer (PSO) uba don bad nga u dang bunkam ha kaban pyllait ia ki kali na ka jingdheng, kumta nga la leit sha utei u nongniah kali ban kyrpad ban pyllait lynti.
Hynrei ha katei ka por la shem ba u nongniah jong katei ka kali ula buaid bad wat iaka jingkyrpad ban pyllait iaka lynti, la shah pynphai kylla da ka ktien kaba khor bad ka shah byrngem. Kumta haba nga la pyrshang ban pynlip iaka kali khnang ba u nongniah yn ym ioh shuh ban niah shakhmat ia ka kali ba ula buaid, hynrei une u nongniah ula ktah kti pynban” la ong u DC.
U Baranwal ula ong, “U Personal Security Officer, haba ula wanphai sha katei ka jaka bad iohi ia ka jingleh khluid, jingkren da ki ktien ba khor bad jingleh pyrshah da ka bormet jong utei u nongniah, u PSO ula wan tuklar ban ai jingiada ia nga bad kadei ka kamram ka jong u ban leh ia katei bad ula pyndonkam da ka bor kaba rit pyrshah ia utei u nongniah da ka jingthmu ban pyllait ia nga na utei u nongniah kali”.
U DC ula iathuh ba ma u ryngkat bad u PSO kila shah tur ha ki katto katne ngut ki briew ki bym lah ban ithuh kiba la pyndonkam ruh da ki ktien kiba khlem akor watla pyrshang la bunsien ban pynsngewthuh ia ki halor katei ka jingjia.
“Kim shym la bteng tang ban shu kren kynthoh hynrei kila pyrshang ruh ban ym ailad ia ki kali ba kin iaid shakhmat. Hynrei dei tang lyngba ka jingwan tuklar jong ki pulit katei ka jaka ba la ailad ia ka kali jong nga ban iaid noh shakhmat” ula ong.
