Shillong, Nailar 23: Ka All NEHU Workers Union (ANWU), kaba dei ka seng jong ki Nongtrei Casual ka NEHU, ka la pynshai ba kam ju pynkylla satia ia ki mat jingdawa ne Charter of Demand (CoD) kumba la pynbna da ka University Negotation Committee.
Ka Union ka ong ba ka jingpynmih khubor jong ka NEHU ba pynkylla man ka por ia ki mat jingdawa ka dei ka bym shisha namar ka Union haduh mynta ka dang aiti tang kawei ka thup mat jingdawa, kaba la aiti ha u Prof Prabha Shankar Shukla, Vice Chancellor ka NEHU.
Ka Union ka ong ba lait noh tang kito ki shithi ba iadei bad ka jingai ia ki tiar iada, ki gloves, sanitizer, medical allowance, dearness allowance bad kiwei kiwei, baroh ki dei kiba hap hapoh ka CoD. Ki jingdawa kiba don ha ka CoD ki kynthup ia ka bainong ba trei palat por (kaba ka University ka siew tang 12 naia shi kynta), ka gratuity, accident compensation, maternity benefits, travelling allowance, dearness allowance, sick leave, compassionate employment scheme bad kiwei kiwei.
“Ka don tang kawei ka CoD bad kiwei kiwei ki shithi bala phah da ka Union ki dei kiba iadei bad ka jingai ia ki tiar iada, ki gloves, ki sanitizer, medical allowance bad kiwei kiwei” ong I Kong Iba Nongrum, Vice President ka ANWU.
“Ka Union kala pynsangeh ia ka jingiakhih ba jar jar bad ka jingshah thngan kaba sdang ha ka 1 tarik Jylliew bad ba pynbteng ha ka 15 tarik Jylliew , halor ka jingkyrpad jong ka Committee bala khlieh da u Prof Don Syiem hynrei la pynbor ia ka Union ban pynsdang biang ia ka jingiakhih ha ka 8 tarik Naitung hadien b aka Grievances ka Redressal Committee kam shym la lah pynlong dkhot lang ia ki Nongtrei Casual ha ka Committee” ong I kong Nongrum.
I la ong ba u Chairman ka Negotiation Committee ula pynlong ia ka Committee ba shimet bad um ju pyntip eiei ruh em sha ki Nongtrei Casual hashuwa ba un mynjur ia ka draft kaba iadei bad ka jingpynbeit ia ki jingeh ki nongtrei casual.
“Ka Union kala pynsdang biang ia ka jingiakhih ba jar jar bad ka jingshah thngan ha ka 18 tarik Nailar namar ki borkhmih ka NEHU kim shym la lah ban ai da ka jingthoh ia ka kular ba iadei bad ka jingthungkam pura noh, ka jingpyntreikam ia kajuh ka tulop na ka bynta kajuh ka kam” kala bynrap.
Halor ka jingdon ki nongtrei casual ha NEHU, I Kong Nongrum i la ong ba kat kum ka RTI, ki don haduh 323 ngut ha Shillong bad 39 ngut ha Tura bad ka jingsiew ia kine ki Nongtrei ka long T. 17,430 ia ki Unskilled, T. 19,680 ia ki semi skilled bad T. 23,100 ia ki Skilled bad T. 25,380 ia ki highly skilled lait noh ka jingot ia ka 12% ka EPF bad 1.75% ka ESI kat kum ka kyndon jong ka Ministry of Labour.
I Kong Nongrum I ong ba ki Nongtrei Casual kim don eiei pyrshah ia ka NEHU lane ia u Vice Chancellor hynrei ki shu kwah da ka jingkular da ka jingthoh na ki bor khmih haba iadei bad ka jingdawa jong ki khamtam haba phai sha ka jingthungkam pura noh ia ki bad ban pyllait noh ia ka tulop jong u bnai Naiting bad Nailar.
