Shillong, Jymmang 05 : Ka Myntri ka tnad ka koit ka khiah Kong Ampareen Lyngdoh ha ka sngi Thohdieng kala pynpaw ba kam shym don satia kano kano ka jingleh thurmur na ka liang jong ka Ganesh Das Hospital ha kaba iadei bad ka jingjia ia kawei ka longkmie kaba na ka shnong Mawlyndep, ia kaba la rah noh sha NEIGRIHMS ban sei ia u thyrnia uba sahkut ha ka trai kpoh jong ka ha ka por ba ka kha khun.
“Ka jingsiew ia ka bai lutksan kan ym pat mih ha kum kane ka por, namar kaei kaba la iohi kum ka Myntri sorkar, kam I don satia kano kano ka jingleh thurmur ne leh torti. Kumta ka jingai bai lutksan kan ym pat mih” ong ka Kong Ampareen Lyngdoh hadien ka jingwan jurip ia katei kalongkmie na NEIGRIHMS.
Kala pyntip ba katei ka longkmie kala nang iohbor bha bad kam don satia ha kano kano ka jingma.
Halor ka jingkylli, ka Kong Ampareen kala ong, hadien bala lum ia ki jingtip kiba bniah halor ka jingmih jong katei ka jingjia ha kine ki 3-4 sngi kiba la leit, ki jingshisha ki long kiba shai kdar.
“Ka nongpang kala leit ban kha khun bad ka don iaka histori baka dei kaba don hapdeng ka jingma ha ka por pun khun. Ka nongpang kala don ha ka khep kaba eh bha bad ka don hapdeng ka jingeh ban kha khun, hynrei la lah pat ban pynkha ia I khun, hynreiiI khunlung i la don ia katto katne ki jingshitom naduh ka por ba dang pun” ila iathuh.
“Hadien bala dep khaia I Khunlung, la rah iaka kmie sha ka jaka ban khmih bniah iaka jinglong jingman bad ki nongap kila shem ba kala phlei snam bad la rah noh biang ia ka nongpang sha OT ha kaba la sdang ia ki kam ki jam ban pynsangeh iaka jingphlei snam bad ha ka por ba ai jingsumar na ka bynta ban pynkha khun kala don ka jingkdiah jong u thyrnia ia kaba ym lah ban lap satia da ka doctor kaba leh iaka surgery ia kane ka nongpang ha Ganesh Das” ila bynrap.
I Kong Ampareen I iathuh “Ka Doctor kala leh ia kaba dei eh da kaba sop ba spain mardor iaka nongpang bad kala sangeh ia ka jingwad ia u thyrnia namar ba donkam da ki tiar ki tar ban lap ia une u thyrnia ia kaba ym shim la don ha Ganesh Das . Dei namar kane ba ia kane ka nongpang la pynkit noh mardor sha NEIGRIHMS,” ong ka Myntri Sorkar.
Kala pyntip ba ynda la poi ha NEIGRIHMS “Ngi dap da ka jingsngewnguh iaka NEIGRIHMS kiba la wad ia utei u thyrnia da kaba pyndonkam ia ki kor ki bor ba ka don bad na ka liang ka tnad Gynae kala trei mardor ia ka kam bad lap ia u thyrnia ha ka thain trai kpoh. Kam long kaba shisha ba u thyrnia ula kiew shajrong”.
Ka kong Ampareen kala ong ba kum katei ka jingjia kam dei kaba jia tang mynta bad ia ki jingshisha la donkam ban sngewthuh da ki nongpathai khubor, kiba pynsaphriang ia ki khubor sha ki paidbah.
