Shillong Naiwieng 25:Ka Khasi Students’ Union (KSU) bad ka Shillong Socio-Cultural Assamese Students’ Association (SSASA) kila pynshai ba ka jingjia haka shnong Mukroh bad ki jingiakhih kim dei satia na jingiashrut hapdeng ki jaidbynriew Khasi pyrshah iaki Jaidbynriew Assamese hynrei ki long pyrshah iaka sorkar Assam bad Sorkar Meghalaya halor kajingiapher jingmut ka jong ki ha kaban iaid ha ka lynti kaba dei ban pynbeit ia u pud u sam uba la sahteng mynta la palat 50 snem bad kaba la lam ruh sha ka jingduh ia ki jingim briew.
Katkum ka kyrwoh na u Donald V. Thabah General Secretary ka Khasi Students’ Union bad u Surajeet Hazarika President jongka Shillong Socio-Cultural Assamese Students’ Association, kila pynrem jur ia ka jingjia ha Mukroh ha kaba 5 ngut ki rangbah Khasi bad wei u Pulit Forest Guard ka Assam kila khlad haka jingshah siat iap bad kine ki ar tylli ki sengbhalang kila phah ruh iaka khubor sngewlem sha ki bahaiing bahasem jong kitei kiba la khlad noh.
“Ka long kaba sngewthuh shai ba ki nongshong shnong ka Assam kim don bynta eiei ha kaba iadei bad ka jingjia ha Mukroh bad ka don ka jingiadei kaba iajan hapdeng ki Khasi bad ki Assamese kaba la don naduh ki por hyndai hynthai bad kam dei ban duh ban dam da ka jingshah pynsngewthuh bakla ne da ki jingtip kiba ialam bakla ha kum kane ka por” la pynpaw kitei ki nongialam sengbhalang.
“Ha ka jingshisha ka jingiadei hapdeng ki Khasi bad ki Assamese kam dei tang namar ba ki ia sah marjan hynrei haba phai biang sha ka histori, lah ban lap iaki jingshisha iaka jingiatreilang, ka jingkhaii pateng, ka jingiabujli iaka kolshor bad ki nongsiat khnam Khasi kidei ruh kiba don bynta haka kynhun shipai kaba la ialam da u General Lachit Borphukan uba la iakhun pyrshah iaki Mughal.
Shuh shuh ka kynhun ki samla pule kaba kynthup iaka KSU bad All Assam Students’ Union (AASU) kidei kiba don lang haka North East Students’ Organisation (NESO) bad ki don ia kajuh ka thong bad jingangnud. Ka KSU bad ka AASU ki kyrshan mar kylliang ban iakhun pyrshah ia ki bar ri.
Nalor kane, ka SSASA ruh kadei ka kynhun kaba ju kyrshan radbah iaki jaidbynriew Khasi ha ki snem 1970-1980 ha ka jylla Meghalaya, ha ka por ba ka don ka jingiakhih kaba jur ha ka jylla pyrshah iaki mynder ri kiba don ha sor Shillong. Haduh mynta kine ki sengbhalang ki iatreilang ban pynneh iaka jingiadei kaba jan hapdeng ki Khasis bad ki Assamese ha ka jylla Meghalaya.
Ka KSU bad ka SSASA ki pynpaw ruh ba ka jingiakhun ka long pyrshah iaka sorkar Assam bad sorkar Meghalaya halor ka jingbym shimkhia ka jongki ban pynbeit ia u pud u sam kaba la ktah iaka jingim jong ki riewpaidbah kiba sah ha ki thaiñ khappud na ka por sha ka por bad kam dei pyrshah ia ki jaidbynriew Assamese kiba don ha Shillong ne ha kino kino ki bynta jong ka jylla Meghalaya.
Ka KSU bad ka SSASA kila kyntu ia ki paidbah ba kim dei ban shah pynbeij ha ki khubor hamsaia ne ki khubor thok hynrei kidei ban pynthikna ban pynneh iaka jingiadei shi para hapdeng kine ki ar tylli ki jaidbynriew, khamtam ha Shillong bad Guwahati.
Kine ki ar Seng kila kyntu ruh ia baroh ar ki jaidbynriew ba kin kiar na ka jingiakawang ktieh ne ban kynthoh lyngba ki social media kaba lah ban ialam sha ki jingjia kiba sngewsih hynrei kidei ban sngewthuh ba baroh ar ki jaidbynriew ki thrang ban don noh iaki lad ki lynti ban pynbeit noh iaka kam iakajia pud khnang ba baroh ar ki jaidbynriew kin ioh ban im da ka jingsuk bad da ka jingiaburom mar kylliang.
Khatduh khatwai ka KSU bad ka SSASA ki dawa ba ka sorkar Meghalaya kadei ban buh iaka Police Outpost ha ka thaiñ khappud, ban kem bad ban pynshitom ia ki briew kiba donkti ha kam siat pathar bad ban pynshitom iaki katkum ki kyndon aiñ bad ban thaw ia ki lad ki lynti kiba mardor ban pynbeit noh iaka jingiakajia pud da kaba sngap iaka sur jong ki paidbah kiba sah ha khappud.
