Nongpoh, Risaw 23: U Bah ST Rympei u la pynshai ba ki nongpyniaid jong katei ka tamasa lehkmen Cherry Blossom ki la pan jingbit ba shibnai lynter ban pynlong ia ka tamasa kata naduh ka 25 tarik u Risaw haduh 25 tarik u Naiwieng, bad kam shem don satia kano kano ka jingpynbeit ban pynkut ia kane ka tamasa ha ka Sngi U Blei.
Kila ong, hynrei dei tad haduh ba la mih ha ki Lad Pathai Khubor ba ka Dorbar Shnong kan sa tip ba ki nongpyniaid ki don ka jingthmu ban pynkut ha ka Sngi U Blei.
U la iathuh ruh, ba ia ka NOC la ai da ka MCA bad ka RBDSA na ka bynta ka madan Kurkalang bad ka Executive Committee kala ai hadien duh hadien ka jingmynjur lang da ka EC jong ka Dorbar Shnong Lumdaitkhla.
U Bah Rympei u la iathuh ruh, ba dei hadien ka jingtip halor ka jingthmu ban pynkut ia katei ka tamasa lehkmen ha ka sngi u Trai, ka Executive Committee jong ka Dorbar Shnong Lumdaitkhla ka la khot ia ki nongpyniaid jong ka Cherry Blossom ban pan jingshai.
U iathuh ha kane ka sngi la iapynbeit bad la mynjur ban pynsdang noh ia ka tamasa lehkmen kata ha ka 19 tarik u Risaw (Sngi U Blei) hadien ba la wai lut ki jingiaseng paidbah kiban don ha kane ka thain Bhoirymbong kata hadien 3 shiteng ne 4 baje janmiet shaneng.
Shuh shuh ruh, la pyntip ba hadien ka jingmynjur, lang, ka Executive Committee ka kyrmen skhem ba kane ka tamasa lehkmen kan long kaba iaid beit iaid ryntih bad ban lah syndon kyntiew ia ka kam jngohkai pyrthei khamtam hapoh kane ka thain, bun ki nongshong shnong ki don ia ka jingthmu ban sengkam sengjam da kaba tei ia ki Home Stay kumta ka jingwan jong kum kine ki tamasa kan lah ban kyntiew ruh ia ka dong ka thain, pynkut u Bah Rympei.
