Nongpoh, Risaw 23: U Bah ST Rympei, u Rangbah Shnong ka Lumdaitkhla, mynta ka sngi u la ther tyngeh ia ka Kong Purity Phawa kaba dei ka President ka STIEH halor ka jingpynsaphriang ia ka jingiakren phone jong u bad kane ka longkmie ha baroh kawei ka Ri-lum Khasi Jaintia.
U ne u Rangbah Shnong u la dawa syndon ba katei ka longkmie ka dei ban panmap mardor hapoh ka 24 kynta lym kumta, um banse ban ujor sha ki bor jong ka Ain.
Kane ka jingbyrthen jong u Bah ST Rympei, Rangbah Shnong ka Lumdaitkhla, Bhoirymbong, ka la jia ruh ka jingsaphriang ka jingkren jong u bad ka Kong Purity Phawa, kaba la phone ia u dang shen ha ka por mynmiet kumba 10 baje eiei, ha kaba kane ka longkmie ka la pyrshang ban ia kren halor ka jingpyrshah kiba bun ki kynhun ia ka jingthmu ban pynkut ia ka tamasa Cherry Blossom 2023 ha ka sngi U Blei kata ha ka 19 tarik u Risaw 2023.
Lah ban kdew, ba ki kynhun ba bun ki la mih ban pyrshah ia ka sorkar jylla khamtam ka tnad Tourism ka jylla, halor ka jingthmu ban pynkut ia ka tamasa lehkhmen Cherry Blossom ha ka Sngi u Blei kata ha ka 19 tarik u Risaw, ha kaba ka jingsdang ia kane ka tamasa lehkmen kan long ha ka 17, 18 bad 19 Risaw 2023.
Haba kren bad ki Nongthoh Khubor, u Bah Rympei, u la iathuh, ba ka Kong Purity Phawa ka la phone ia u dang shen ha ka por mynmiet, ha kaba ha kane ka jingiakren katei ka longkmie ka la pynmih ia ka jingiakren halor ka jingbym pyrshah jong ka Dorbar Shnong Lumdaitkhla ia ka jingthmu pynkut ia ka Cherry Blossom ha ka sngi U Blei.
Hynrei kaba sngewkhia kaba jur ka long ba katei ka longkmie ka la record pynban khlem ka jingbit jong u ia katei ka jingiakren bad u bad thad paidbah pynban ia kane ka jingiakren jong ki.
U la iathuh ruh, ba kane ka jingthad ia ka jingiakren phone jong u bad katei ka longkmie ka long shisha kaba beain namar ia ka jingiakren la shu record khlem ka jingbit jong u kaba la ktah ruh ia ka jinglong shimet jong u (Privacy matter) bad kane ka long beain bha katkum ki kyndon ain.
Namar kane, u la dawa na ka Kong Purity Phawa ba ka dei ban pan mab halor ka jingsaphriang jong kane ka jingiakren jong u bad ka hapoh ka 24 kynta lem kumta na ka liang jong u um banse ban shim da ki lad ba tyngeh ban ujor noh sha ki bor jong ka ain.
