Nongpoh, Risaw 23: Ka Lympung iakhun niah kali AHOR 4X4 Off-Road ka la poi noh sha kaba kut ha ka sngi saitjain. Kane ka lympung niah kali ha ki lynti kiba khohruh khohram kala long haduh 3 sngi lynter.
Ha kane ka lympung la wan ban ia shimbynta da ki nongniah kali shynrang bad kynthei kiba tbit na kylleng ka thain Lam Shatei Mihngi kynthup napoh ka jylla Meghalaya. I ia kane ka lympung la pynhap pyrda noh hapoh ka Kharsati Park, Ri Bhoi District.
Ia kane ka lympung niah kali la pyniaid da ka kynhun jong ka Adventurous Hynniewtrep Off Roaders, ha kaba la phiah ia ki jingiakhun ha ki katto katne ki kyrdan ban kynthup naduh ka SS-I, SS-II, SS-III, SS-IV bad SS-V, kynthup ka jingiakop niah kali ha ka por mynmiet.
La pynhap pyrda ia kane ka lympung da u Bah MB Tongper, Additional Deputy Commissioner ka Ri Bhoi District ha ka jingiadonlang ruh u Bah William Hek, Symbut Kongsan, u Bah Damian Umdor, President ka AHOR, u Bah Ferdynald K Kharkamni, Vice President ka AHOR nalor kiwei kiwei.
