Nongpoh, Lber 22 : Ka Shad Sajer Committee jong ka Elaka Nongpoh Sirdarship, kala rai ban pynsangeh noh ia ka lehniam Shad Sajer ban pynpaw ia ka jingpyrshah halor ka kam thung Sirdar Elaka da ka Khasi Hills Autonomous District Council (KHADC).
Ka Shad Sajer Committee kala buh ban pynlong ia ka lehniam Shad Sajer ha ka 23 tarik Lber ha u lum Wortoh.
Ka jingpyrshah ka long ba ka KHADC kala thung biang ia u Bah Wanphran Syiem Nongshai kum u Sirdar ka Elaka da kaba pynkut noh ia ka jingtreikam u Bah Pillarstone Syiem Nongshai kum u Acting Sirdar.
Ka Shad Sajer Committee ryngkat ki Lyngdoh na ki 6 tylli ki Raid ba kynthup ia ka Raid Nongkharai, Raid Nongpoh, Raid Nonglyngdoh, Raid Nongkhrah, Raid Sohkhwai bad Raid Nongkyrla, kila mynjur lang ban pynsangeh noh ia kane ka jinglehniam. Kane ka rai kala mih na ka jingialang ba long hynnin ka sngi Palei.
Kane ka Committee lem bad ki Raid kia pyrshah ia ka jingthung biang ia u Wanphrang Syiem Nongshau kum u Sirdar, uba la shah sospon shipor na ka jingdon ka jingujor pyrshah ia u halor ki kam synshar khadar.
Haba kren sha ki lad pathai khubor, u Chairman ka Sajer Committee Bah Luistar Lyngdoh ula ong b aka Sajer Committee ka pan map na ki khun ki hajar ki Raid jong ka Elaka Nongpoh bad kumjuh ruh ia ki paidbah ka Bri u Hynniewtrep, ki nongshah khot sngewbha kiba thmu ban wan sakhi ia katei ka jinglehniam kaba la pynkhreh da ka Committee ban pynlong ha ka 23 tarik Lber.
