Shillong, Lber 22 : Ka kyrtong ka National People’s Party (NPP) Kong M Ampareen Lyngdoh, ka dei kaba nyngkong eh ban thep kyrteng kum ka kyrtong ban iakhun ia ka elekshon Lok Sabha na Shillong Parliamentary seat.
Kane ka Myntri Sorkar kala leit thep kyrteng hakhmat u Returning Officer ka East Khasi Hills hynne ka sngi Thohdieng.
Ia ka Kong Ampareen la synran da u National General Secretary ka NPP Bah Sniawbhalang Dhar bad President ka NPP-Meghalaya Bah Prestone Tynsong, kiba dei ruh ki Symbud Myntri Rangbah ka Jylla lem bad ki hajar ngut ki nongkyrshan.
Ka Kong Ampareen kala sdang ia ka jingleit thep kyrteng da ka jingiaid paidbah naduh Laitumkhrah sha u mot sahnam jong u Kpa Bah Peter G Marbianiang (uba dei u MP Lok Sabha ha u snem 1989 haduh 1996) ban duwai bad pan ia ka jingkyrkhu kyrdoh.
Nangne, ka Kong Ampareen bad ki nongkyrshan kila iaid kjat sha ka Ophis ka NPP kaba don ha Lachumiere hashuwa ban leit sha ka Ophis u Deputy Commissioner ka East Khasi Hills, Shillong.
Ka Kong Ampareen ka bat ia ka shu Myntri ha ka Sorkar MDA-II.
Haba iakren bad ki nongthoh khubor, ka kong Ampareen kala ong “Ka dei ka sngi kaba kongsan ia ngi bad ngi tyrwa ialade kum ka kyrtong jong ka NPP ha ka elekshon Lok Sabha 2024”.
“Nga la pyndep ia ka jingiaid lynti jong nga ha baroh 36 tylli ki Assembly constituency. Nga la iaid palat shispah kilo meter ha kine ki lai bnai shiteng bala dep. Hynnin, nga la pyndep ia ka bynta ba khatduh jong ka constituency jong nga. Nga sngew hun ba mynta la ia ithuh ia nga bad tip ia kaei kaba ngan leh. Nga tip kin don shibun ki jingkhmih lynti hynrei kumba ngi ong, ngi wan hangne ban shakri ia ki paidbah bad ngan pyrshang kat kaba lah ban shakri ia ka bha tam ha ka bor jong nga” kala ong.
“Nga donbok palat ba nga don ka kynhun NPP baroh kawei ha lyndet jong nga. Nga kmen bha ba ka Iing ka sem, u Kurim, ki para, ki hynmen bad ki Khun ki kti ki don ha syndah jong nga. Ngin ai ia kaba bha tam bad ngin ieh ha ka kti ki paidbah, sngewbha vote ia nga kum ka kyrtong kaba being eh na ka thup ki kyrtong kaba ki don bad nga kyrmen ba na kane, ngan sa rung sha kawei pat ka lynnong jong ka kam sain hima sima ha ka jingim jong nga” kala bynrap.
Ka Kong Ampareen kala ong ba kam don satia ka jingsngew pyrshah jong ki paidbah ia ka NPP haba phai sha ka elekshonMP bad bynrap ba kane ka jingkylli ka dei ban leit sha u briew uba dei, uba la long MP la bun snem.
“Hynrei, kum ka Political Party, ngi la jam shakhmat bun shah ha ka jingshakri ia ki paidbah, ki paidbah ka Shillong kila tip bha ia ki plan ka Sorkar, ki jingtyrwa bad ki kam pynroi. Ngi don ia ka blueprint ka ban ialam ia ka Meghalaya shakhmat” kala ong.
Haba pynpaw ba kane kan dei ka sien ba nyngkong ba kaNPP kan iakhun ia ka elekshonMP na Shillong seat, ka Kong Ampareen kala ong “Ngi kyrmen ba ngin ioh ia ka jingjop ha ka sien ba nyngkong”.
Haba kylli la kan dei ka jingtynjuh ban pynliem ia ka Congress, ka kong Ampareen kala pynpaw ba ka tip bha ia ka madan ialehkai ka Congress bad kan sa pyndonkam ia ka na ka bynta ka jingiohnong ialade.
Haba kyntait ban kren eiei pyrshah ia kiwei pat ki Political party, kane ka Myntri Sorkar kala ong “Nga wan hangne ym ban iatai nia ia ka jingiakhun pyrshah. Nga iakhun ia ka elekshon naka bynta ka NPPm ngan ym kren shaphang ki nongiakhun pyrshah lane ngan niew ialade kum ka nongialeh pyrshha. Ngan trei la ka jong ka kam, ngan jam shakhmat bad kren tang halor ka jinglong kyrtong ka NPP ngan ym iakren ia kahan, kiba bynthiew ia ngi ieh ki mat byntiew, kam don jingpher hynrei nga hi ngan trei la ka kam, ngan ai iala ka jong ka jingtyrwa hakhmat u paidbah bad kane kala biang eh ia nga”.
