Shillong, Rymphang 07 : Ka Iingkashari Meghalaya High Court ha ka sngi Thohdieng, kala hukum ia ki bor Sorkar ba kin pynsangeh shuwa ia ka jingpom ia ki dieng bad ban bishar thymmai ia ki rai ban pynthikna ba ka jingpom ka dei ban long kat kum ka lynti jong ka Ain.
Haba pynmih ia ka hukum hadien ba bishar ia ka PIL halor kane ka kam, ka Iingkashari ba kynthup ia u Chief Justice IP Mukherji bad Justice W Diengdoh kila ong “Haba iadei bad ka rai bala dep shim ban shah pom ia ki dieng hynrei ka jingpom ka bym pat iaid haduh mynta, ki bor ba dei khmih ki dei ban pynsangeh shuwa ia ka jingpom ia ki dieng bad bishar biang ia ka rai ban pynthikna ba kila iaid kat kum ka lynti ka Ain”.
Kala hukum ruh ia ki bor Sorkar ban iathuh ia baroh ki aplikeshon ba dang sahteng ban pynkhyllem ia ki dieng ha ka thain East Khasi Hills.
“Ki dei ban pynthikna ba baroh ki aplikeshon kin iaid bad shim rai kat kum ka ain bad ka rule. Ka dei ban iathuh ia kumno la pyniaid ia ka kam bad ka jingmih na kawei pa kawei na kine ki aplikeshon ba dang sah” kala ong.
“Lada ka lah don ka jingpynkhyllem beain ia ki dieng ka bym lah leh eiei shuh, ngi bthah ba ha kano kano ka jaka ba pyn khyllem ia kine ki dieng, ki nongshah mudui ki dei ban shim ia ka sienjam ban thung biang kumjuh ia ki dieng kiba dei hi kijuh ki jait dieng, khnang ban pynjyrngam biang ia ka thain kumba ka long” kala bynrap.
Ia kane ka PIL la mudui da u Bah Geralding G Shadong ba kyrpad ia ka Iingkashari ban pynsangeh ia ka jingpom dieng beain da ki bor Sorkar ha ka thain Lower New Colony, Laitumkhrah.
Hynrei, haba khmih ia ka rukom long, ki jingktah jong kane ka mudui, ka Iingkashai kala rai ban kynthup ia baroh kawei ka East Khasi Hills District hapoh kane ka mudui bad kane ka hukum.
Ha kane ka mudui, u nongmudui ula ieng halor ka nongrim jong ka Meghalaya Tree (Preservation) Act, 1976 bad ka Meghalaya Tree (Preservation) Rules, 1976 kaba ong ba shuwa ban ai jingbit ban pom ia ki dieng hapoh ka Jylla, dei ban da thoh aplikeshon da u Divisional Forest Officer ha Form-I jong ka Rules, ka ban pynbud da ka jingtohkit jong u Divisional Forest Officer shuwa ban ai jingbit.
