Shillong, Nailur 03 : Ki nongiasaid ain ha Meghalaya kin sdang biang ban trei biang ia ki kam ha Iingkashari naduh ka sngi Palei hadien ba ka Shillong Bar Association bad ka High Court Bar Association kila rai ban pynsangeh shuwa shipor ia ka jingiakhih halor ka jingdawa weng ia u Amit Kumar kum u Advocate General.
Kane ka rai kala mih hadien jong ka jingialang bad ka Sorkar Jylla kaba la pyniaid da u Symbud Myntri Rangbah Bah Prestone Tynsong ha ka sngi Balang.
U Myntri ka Tnad Ain Bah Lahkmen Rymbui ula iadonlang ha kane ka jingialang.
Haba iakren, u Secretary ka SBA Bah TL Jyrwa ula ong ba u Symbud Myntri Rangbah ula kubur ia ka jingkhia jong kane ka kam bad kular ba ka Sorkar kan sa bishar ia ki jingsngewkhia ba dei hok bala pynsngew da ki Bar Association.
U Bah Jyrwa u iathuh ba ka Sorkar kala pan por artaiew ban shong bishar ia ka kam bad kular ruh ban sa iakynduh biang ia ki dkhot ka Bar Association hapoh ka shitaiew.
Kum ka sienjam ba shipor, ka Sorkar kala bthah ia u Advocate General bad ka kynhun jong u ba kim dei ban leit mihkhmat sha Iingkashari na ka bynta ka Jylla hapdeng kane ka por.
‘Watla ka dei kaba tang shipor, ngi la pdiang ia ka namar ka Sorkar kala pdiang ia ki jingdawa jong ngi” ong u Bah Jyrwa.
U ong ba ki nongiasaid Ain kila shah pynbor ban shim ia ka lynti jong ka jingiakhih namar ka jingbym leh eiei ka Sorkar ia ki jingdawa.
“Ngim kwah satia ban shim ia kane ka lynti, hynrei namar ka jingmynthi jong ka Sorkar, ngi hap ban leh ia kane” ula bynrap haba pynshai ba ia ka jingiakhih la shu pynsangeh shipor ym ba la weng.
“Ka jingdawa jong ngi ka iai long beit kawei- weng ia u Advocate General. Ngi shu pynsangeh ia ka jingiakhih na ka bynta artaiew. Lada hadien ka jingialang, lada kam don ka jingweng, ngin sa pynbna ba ka jingiakhih kan bteng biang” ong u Bah Jyrwa.
