Shillong, Jymmang 30: Ka Jaiñtia Students’ Union (Central Body) ka la rai ban pynsangeh shipor ïa ka jingïakhih kaba dang ïaid shakhmat ha kaba ïadei bad ka jingbym ioh class ki samla pule kiba dang shu pass ia ka eksamin SSLC
Kane ka rai ka long hadien ba ka Synjuk ka la aiti ïa ka thup jong ki khynnah skul ki bym shym la lah ban ïoh admission class sha u District School Education Officer (DSEO).
Na ka liang u DSEO u la kular sha ki dkhot ka JSU ba ïa kane ka kam yn sa shim khia bha bad ka la tyrwa ban sdang ïa ka Evening Batch Session ha Kiang Nangbah Government College (Higher Secondary Section), kyrpang na ka bynta kito ki samla pule ki bym shym la ïoh admission ha kino kino ki jaka pule ba kham heh ha ka thaiñ Jaiñtia Hills.
Shuh shuh u DSEO ula ai ruh da ka jingthoh sha ka union, kaba pynthikna ba la dep phah ïa ka shithi ba thikna sha u Commissioner bad Secretary ka tnat Pule Puthi, ha kaba pan jingmynjur bad jingkyrshan ban sdang noh ïa ka Evening Batch Session ha Kiang Nangbah Government College, Jowai.
