Shillong, Nailar 3: Ka Liang Pyrshah All India Trinamool Congress (AITC) hynnin ka sngi ba-ar, ka la kam ba ka jingiakhih ba dang shen jong ka ha Delhi kala seisoh hadien ba ka Iingdorbar Parliament kala pynrung ia ka mat iatai hapoh ka Zero Hour, ban pynrung ne ai jingithuh noh ia ka ktien Khasi bad Garo hapoh ka Khyrnit ba Phra jong ka Riti Synshar ka Ri
“Tang hapoh shitaiew hadien ba ki Nongialam ka TMC kila leit pynsngew ia ki ishu ka Jylla ha ka Nongbah ka Ri, mynta ka sngi ka Parliament kala pynrung ia kawei ka mat ba donkam eh, kata ban pynrung ia ka ktien Khasi bad Garo ha ka khyrnit ba phra ban iatai hapoh ka Zero Hour” ong ka AITC ha ka kyrwoh.
Ha ka 26 tarik Naitung, ka kynhun ki Nongialam ka AITC ba kynthup ia u Dr Mukul Sangma bad MLA George Lyngdoh lem bad ki MP ka AITC kila pynlong ia ka jingiakhih shabar ka Iingdorbar Parliament ban dawa pyndam noh ia ka soskular pynbeit pud jong ka Assam-Meghalaya bad ban pynrung ia ka ktiken Khasi bad Garo ha ka khyrnit ba phra ka riti synshar ka Ri.
Haba iakren bad ki lad pathai khubor, u Dr Mukul ula ong ba ka ktien ka thylliej ka dei kaba donkam bha kum shibynta ban pynneh pynsah ia ka snap ba kyrpang. Ka jingpynrung ia ka ktien Khasi bad Garo kan iarap ban kyntiew ia ka iohkam iohjam jong ki samla ka Jylla.
U MP ka Rajya Sabha Derek O’Brien ha ka 5 tarik Naitung ula thoh sha u Secretary General ka Rajya Sabha ban iatai ia ka kam ba iadei bad ki ktien ki thylliej ka Jylla Meghalaya.
Ha ka shithi, u Derek ula ong “Ka jingkyntait ban pynrung ia ka Ktien Khasi bad Garo kum ki Official Language jong ka Ri, ka pyni ia ka jingleh kmienah jong ka Sorkar Pdeng ia ka thain Shatei Lam Mihngi khamtam ka Jylla Meghalaya. Nga pynrem ia ka Sorkar Meghalaya ba mynta bad ia ka sorkar Pdeng halor ka jinglong mutlop halor ka jingsngew jong ki nongshongshnong ka Jylla”.
“Da ka jingwan ka mat iatai mynta ka sngi ha Parliament, ka TMC Meghalaya kala pyni shisha ba ka dei kawei pat ka kynhun kaban bteng ban tynruh ia ki ishu ka Jylla hapoh Delhi, kaba long kaei kaei kaba ka Liang Synshar kam shym la lah leh eiei naduh ba ka wan ha ka bor” ong ka TMC.
U MP ka TMC Sudip Bandopadhyau ula ong ba ka ktien Khasi ka dei ka Austro-Asiatic Language bala kren bha da ki riewlum ka Jylla Meghalaya bad ki jaka lum ka Assam. Ka Garo ka dei ka Tibeto-Burmese Langguage jong ka Jaidbynriew Boro-Jingpko bala kren ha Meghalaya, Assam, Tripura bad Nagaland.
Kat kum ka khana samari u snem 2011, ki don haduh 13 lak (46.5%) ki nongshongshnong ka Meghalaya kiba kren Khasi bad 9 lak (31.5%) kiba kren Garo.
