Shillong, Nailar 3: Hadien ka jingkut ki jingiakhun ba itynnad jong ka first leg OC Blue Shillong Premier Leaque 2021-2022, mynta ka sngi kan sdang pat ka jingiakhun jong ka second leg bad ka kynhun ba kamai bun point eh ha ka miej kamai point kan dei ka lahduh ha kane ka samoi.
Ka jingiakhun jong ka second leg kan sdang da ka jingialehkai hadpeng ka lahduh ba mynshemsnem ka Shillong Lajong FC pyrshah ia ka Rangdajied FC. Ka jingiakhun jong kine ki kynhun kan long ha madan Third Ground, Polo ha ka por 4 baje janmiet.
Ha ka jingiakhun first leg jong kine ki arkynhun kaba long ha ka 18 tarik Naitung, ka Rangdajied kala lah ban pynliem da 2-0 kol, kaba dei ruh ha ka sien ba nyngkong eh baka RUFC kala lah ban jop ia ka Lajong ha ka OC Blue SPL.
Ha kane ka samoi lehkai ba mynta, ka Lajong ka don ha ka kyrdan ba hynriew ha ka jingkamai point bad kine ki point kila wan tang na ka jingjop ia ka Malki SC bad ka Mawkhar SC kiba don mynta ha ka thup ban shah pynhiar kyrdan.
Ka Rangdajied ruh kam da lah ialehkai bha ha kane ka samoi ba mynta bad kala ioh khur tang lai tylli ki jingjia bad kut ha ka jingiakhaid pyrshah ia ka Malki bad ka Mawkhar. Kane ka kynhun ka don ha ka kyrdan ba lai ha ka miej iakhein point.
Ka Mawlai SC kaba dang shu wanphai biang sha ka OC Blue SPL hadien bun tylli ki samoi ialehkai hapoh ka First Division, kala lah ban ialehkai bha bad ioh khur haduh 19 point na ki 7 tylli ki jingiakhun. Kaba pynshoh biej ka long ba kane ka kynhun haduh mynta kam pat shah thep wat shi kol ruh na ki 630 minit ka por ialehkai.
Ka jingkylli kaba mih mynta ka long ba hato ka Mawlai SC kan lah ban kyrda ia ki jingtynjuh jong ki club ba kham paw haba nang jam sha kaba kut jong ka samoi.
Kane ka kynhun kan shaniah mynta ha ka jingtbit bad jingshemphang jong u rang ialehkai ba paw ka Jylla ba la kylla long u Coach, u Bah Khlain Pyrkhat Syiemlieh bad kumjuh ruh kiwei pat ki rang ialehkai kiba la ioh khur tang ia ka nam SPL Champion kum u nongap kol, u samla Neithivilie Chalieu (uba ialehkai mynshuwa na ka Lajong) bad ki lai ngut ki rang ialehkai ba kynthup ia u Brolington Warlarpih, Fullmoon Mukhim bad uDonborlang Nongkynrih, kiba la jop teng ia ka SPL n aka kynhun ialehkai jong ka Langsning SC.
