Shillong, Naiwieng 22: Ka Catholic Association of Shillong kala pynrem jur iaka jingsiat bad jingpyniap pathar jong ki pulit Assam ia ki mynsiem briew kiba lui lui ha shnong Mukroh kaba hap ha West Jaintia Hills hynne ka sngi.
Katkum ka kyrwoh naka CAS kala pynpaw ba namar katei ka jingsiat pathar jong ki pulit Assam, 6 ngut kila duh ei iala ka jingim bad bun ngut kila mynsaw.
“Ngi phah iaka jingsngewlem sha ki bahaiing bahasem bad buh ha ki jingduwai na ka bynta kito kiba la khlad noh bad ngi duwai ruh ba kito kiba mynsaw kin ioh noh iaka met kaba koit ba khiah” la pynpaw u President ka CAS u Bah JA Lyngdoh.
Ula ong, ka Balang ka long hakhmat eh ban kyntiew iaka shongsuk shongsain bad ban ia im suk im sain hapdeng ki jaidbynriew bapher bapher bad ka kam iaumsnam ha kano kano ka dur kam dei ban don jaka ha ka imlang sahlang kaba la shai.
“Ki riewngeit Katholik jongka Shillong Archdiocese ka kyntu ia baroh ki riewngeit bad ia ki nongshong shnong ka jylla ban pynneh iaka shongsuk shongsain bad ban ia im suk im sain hapdeng ki jaidbynriew bapher bapher” la pynpaw ka CAS.
Kala kyntu ruh iaka sorkar jylla ba kan shimkhia ia kane bad ka sorkar pdeng bad ka sorkar Assam khnang ba yn lah ban wanrah biang iaka shongsuk ha ki jaka kiba la shah ktah bad ban pynthikna ban ai iaka jingbishar kaba hok.
Halor katei ka jingjia kaba sngew shyrkhei, kumta yn pynlong iaka jingbuh jingduwai ha ka Cathedral of Mary Help of Christians, Laitumkhrah Shillong haka sngi Balang ha ka por 5 baje janmiet na ka bynta ban buh jingduwai ia kito kiba la khlad noh bad ban don ka shongsuk shongsain haka jylla.
