Kokrajhar, Naitung 09 : Ka National Boro Christian Council (NBCC) ka la pynpaw ka jingsngew bynniaw ka ba jur halor ka jingkynthoh da uwei u riew shimet u ba kyrteng u Satyaranjan Bora u ba la ong ba dei ban weng noh ia ka bhah ST na ki riewngeit Khristan ki ba dei na ka jaidbynriew Bodo.
Kane ka jingkren ka la wanrah ka jingkynthoh ka ba jur na ki ba bun balang, kata da ka ba kam ruh ba une u briew u ba la ioh ia ka jingkyrshan na ka RSS u la pyrshang ban pyniaphiah ia ki nongshong shnong ki ba dei ki Bodo ki ba im hapdeng ka shongsuk shongsain ha la ki jong ki jingngeit niam.
Ha ka jingthoh ba la pyllait da u Arjun Basumatary, president ka NBCC, bad u general secretary u Apurba Narzary ki la pynpaw ba ka jingthoh jong ki heh sorkar ka Dularai Bathou Gauthum bad ka RSS ha ka nongbah Guwahati ha ka 5 tarik mynta u bnai, la kam ba ia ka bhah ST dei ban weng noh na ki Khristan ki ba dei ki Bodo.
Kane ka dei ka mat ka ba khia shibun bad ka dei ka jingpyrshang ban pyniaphiah ia ka imlang ka sahlang. Hynrei na ka liang ka NBCC watla katta ka la pdiang halor ka jingpynpaw da ka Bodo Sahitya Sabha (BSS) bad ka All Bodo Students’ Union (ABSU) ki ba la pynshai ba ki jaidbynriew Bodo ki la ia im ryngkat lang hapdeng ka jingsuk bad ha la ki jong ki jingngeit niam.
Na ka liang ka ABSU ka la pynrem ruh halor katei ka jingkynthoh jong u Satyaranjan Bora u ba dei u president jong ka Kutumb Suraksha Parishad halor ka jingpyrshang ban pyniaphiah ia ki jaidbynriew Bodo.
Kumjuh na ka liang ka NBCC ruh ka la pynrem jur ia katei ka jingkynthoh jong u Bora pyrshah ia ki Bodo ki ba dei ki Khristan da ka ba ong ba ka dei ka bym lah ban pdiang.
