Kyntu ia u Bah Prestone ban hiar shuki lada ym lah pyniaid ia ka Tnad
Shillong, Risaw 08 : Ka Khasi Students Union (KSU) kala pynrem ia ka jingpyrshang jong u Symbud Myntri Rangbahba khmih ia ka kam Pohiing (Police) Bah Prestone Tynsong ban pyniasnoh ia ka rally ba 19 tarik Nailar ka seng bad ki kam lum pisa beain ki Pulit.
Kat kum ka kyrwoh na u Information and Publicity Secretary samla Pynshai Kupar M Dkhar, ka ong ba ki san tylli ki mat kiba ka KSU ka dawa na ka Sorkar, ki dei kiba shong nongrim, na bynta ka bit ba biang ka jaitbynriew.
“Ka jinglum pisa be-aiñ ne ka jinglong bakla jong ki pulit bad ka jingïakhih paidbah jong ka KSU ki dei ki mat kiba ïapher. Ka jingpynïasnoh ïa kine baroh kam pynjah ïa ki jingkylli kiba paidbah ki buh ïa ka tnad pohiing, hynrei ka pyni tang iaka jinglong khynnah ban da rapjot” ong ka KSU.
Haba pynkynmaw ia ki kyntien u DyCM ba hikai shwa ban kren bad da pyrkhat shispah sien, ka KSU kala ong “Ki kyntien kiba phi thmu ban iada ia kiba donkti bad iaphi ki lah ban wanphai biang bad ktah ia phi kham jur ban ia ka jingkylli kaba phi pyrshang ban phet naka”.
“Lada ka Tnad Pohiing ka la poi haduh u pud ba kam lah shuh ban pynbeit ne ban ai jubab shai halor ka jingleh jong ki briew kiba hap hapoh ka jingpeit jong ka, te ka jingkylli kaba paidbah ki dei ban buh kam dei shuh “Mano kita ki nongpynkulmar ha ka rally jong ka KSU?” hynrei “Mano hi u nongpeit bad nongkitkhlieh ïa ka Home Department?” kala bynrap.
Ka KSU kala ong ba “Lada ka jingïalam ïa ka tnad home ka la long kaba eh palat, ka don ka lynti kaba don burom, kata da kaba hiar noh na ka Shuki”.
Kala ong ba ka KSU kan ym shah ban pynphai lynti da kine ki “political gymnastics”haba la don bad iohi paitbah ki pulit ki la lum pisa be-aiñ, te to tohkit mano ba la ai jingbit, tohkit mano ba la ïoh jingmyntoi, bad shim ïa ka sienjam katkum ka aiñ”.
