Shillong, Risaw 06: Ka Seng Hynniewtrep Youth Council (HYC) kala pynrem jur ia ka jing kawang bomb pynsat khmat (Tear Gas) ki Pulit ia ki Nonghikai kontrak kiba tur paidbah sha Secretariat ha ryngkat ki khun ki kti jongki ban dawa ia ka hok ban kamai jakpoh.
U General Secretary ka HYCu Bah Roy Kupar Synrem ula ong, kane ka jingleh jong ki pulit ban siat da ki bomb pynsat khmat ia ki Nonghikai ba kynthup ia ki nonghikai kynthei bad ki khun rit ki jongki kaba lah wanrah ruh ka jingmynsaw ia ki katto katne ki nonghikai, ka long kaei kaei kaba ym lah ban pdiang.
“Hato kitei ki Nonghikai lem bad ki khun ki jong ki kidei ki Nongleh be-aiñ? Hato kidei ki dkhot jong kano kano ka kynhun ba lah khein be-aiñ da ka Sorkar? Hato ki rah ia kino kino ki tiar pyn mynsaw lane ki iakhih da kano kano ka jingmut kaba long be-aiñ ha kaba lah pynlong ia ki pulit ban siat bomb pynsat khmat ia ki?”buh jingkylli u Bah Synrem.
“Mano ban shim jingkitkhlieh lada jia kino kino ki jingjia ba sngewsih ia ki Khyllung khynnah? Balei ba ki pulit ki hap ban shim ia kum kane ka sienjam, ka long ka jingkylli kaba ngi kum ki paidbah nongshong shnong ka Jylla ngi hap ban tip bad sngewthuh?” ula bynrap.
Ka HYC ka dawa na ka Sorkar ba kadei ban thung ia ka kynhun tohkit ban lap ia ka jingshisha halor katei ka jingjia bad ban pynshitom ia ki pulit lane ia ki majistor kiba lah aibor ban siat bomb pynsat khmat ia ki nonghikai bad iaki khun ki kti jongki khnang ba kum kine ki jingjia kin nym jia shuh nangne shakhmat.
Une u Nongialam ka HYC ula kyrpad ruh ia ka Meghalaya High Court bad ia ka Meghalaya State Human Rights Commission ba kan shim kam dalade hi (Sou Moto) ia kane ka jingjia bad ba kan tohkit bad pynshitom ia ki pulit bad Majistor kiba pyndonkam bakla bad palat pud ia ka bor ka jongki.
