Shillong, Risaw 06: Ka Chairperson ka State Commission for Protection of Child Rights (SCPCR), Kong Ïohmon Syiem, kala kular ba ka Commission kan pynthikna ia ka bha ka miat jong ki Khun ki kti jong ki Nonghikai ba iakhih, kiba shah ktah na ka jingkawang bomb pynsat khmat hynne ka sngi palei.
I Kong Iohmon i ong baka Commission kala wan ban khmih ia ka jinglong jingman bad ban pynthikna ba kam dei ban don ka jingpyn khein ia ka hok jong ki Khynnah.
“Tad hadien ba ngi la ioh ia ka kaiphod na baroh arliang mamla, ngi naka Commission ngin sa lah ban kren eiei halor kane ka jingjia” ila ong.
Shuwa kane, I Chairperson ka SCPCR ila shim jingthoh ruh ba batai ia ka jingjia na ki Khynnah bad ki Nonghikai Kynthei kiba shah ktah na kane ka jingkawang bomb pynsat khmat.
Halor ka jingkylli ba leh tohmet ki Pulit ia ki nonghikai kynthei, i Chairperson ila ong ba im lah satia ban kren eiei halor kane hynrei ila ong ban peit ia ka jinglong jingman bad ban pynthikna ba ym dei ban pynmong ia ki Khynnah.
“Ngi wan hangne na ka bynta ka bha ka miat jong ki Khynnah. Ngin hap ban ap ia ka kaiphod ban tip ba haduh katno ngut ki khynnah kila mynsaw” ila ong.
