Shillong, Jylliew 26: Ka Thma u Rangli Juki (TUR) hynne ka sngi U Blei kala pynrem jur ia ka jingthombor mynsngi mynshai ia ki arngut ki samla na Kerela hajan Robert Hospital, Jaiaw haba dawa ia ka Sorkar ba ka dei ban thwet bad kem ia ki runar kiba donkti.
Kat kum ka jingong ka TUR, kine ki samla ki dei kiba wan ban shim ia ki jinghikai pyntbit (internship) ha Shillong bad kila shah shoh ha ka por ba ki dang iamih ban leit bam ja sngi.
Ka TUR kala ai jingiaroh ruh ia ki Nongshongshong ka thain kiba la khang pyrshah ia kane ka jingthombor bad ban iada ia kine ki samla pule na Kerela haba ong ba kane hi ka pyni ba bun ki nongshongshnong ka Shillong bad Meghalaya kim pynshlur satia ia kum kine ki runar ne ki kam thombor jong ki.
“Hynrei ngi tip ba kum kane ka jingthombor ia ki bym dei ki Khasi la ki dei ki Nongbylla, ki nongtyrwa tiar, ki nongpynpoi mar bad kiwei kiwei kila jia ha ki snem baal leit noh kaba la wanrah ia ka jingbym sngew shngain hapdeng ki nongshongshnong ka Nongbah Shillong” ong ka Nongialam ka TUR kong Angela Rangad ha ka kyrwoh.
Haba pynpaw ba ki don katto katne ki jingjia thombor kiba la pyntip sha ki Pulit bad don ruh kiba khlem pyntip, I kong Angela ila ong b aka TUR ka dawa jur ia ka Tnad Pulit bad ki bor District ba kin tohkit bniah ia kum kine ki jingjia bad ban pynshitom ia ki runar kiba pynkhein ia ka hok longbriew ki briew bad ba pynbudnam sniew ia ka Jylla bad ia ka Jaidbynriew.
“Ka TUR ka pynpaw ia ka jingsngewlem sa shisien ia ki paralok na Kerela bad dawa ba ka Tnad Pulit ka Jylla bad ki bor district ki dei ban tohkit kloi bad kem ia ki briew ba donkti ha kine ki kam khawpud bad ban ailad ba ka ain kan iaid hala ka jong ka lynti” ila ong.
Ha kajuh ka por, ka TUR kala kyntu ia ki Dorbar Shnong kiba kum kine ki jingjia ki jia ba kin shimkhia lang ha ka ban pynioh ia ka jingbishar kaba hok ia ki ba shah thombor bad ban thaw ia ki lad ki lynti ban lah wanrah ia ka jingsuk.
