Tura, Naitung 07: Da ka ba pynrem jur halor ka jingshah thombor jong kawei ka longkmie na North Garo Hills ha ki bor pulit ka Assam ha Dudhnoi police station ha kane ka sngi Nyngkong ba la lah, da ki spah ngut ki paidbah ha ryngkat ki kynhun seng bapher bapher na ka thain hynne ka sngi Palei ki la pynlong da ka jingiakhih hapoh ka madan ialehkai ha Bangsi Apal.
Da ka ba dawa ban pynioh ia ka jingbishar hok na ka bynta kane ka lanot ka ba la shah bom shah tied ha ki bor pulit ka Assam, kine ki paidbah ki la ong ba ka jingpynsangeh kam ba shipor (suspension) ia ki pulit ki ba donkti kam pat long ka ba biang hynrei ki dei ban shah weng noh shi syndon na ka kam.
Nalor kata ki la dawa ruh ban siew bai lutksan na ka bynta kane ka lanot. Ka dkhot ba rangbah jong ka seng ‘Mothers Union’ ka Dainadubi unit ka Numberline R Sangma ka la kren na ka bynta baroh ki longkmie jong ka thain ban pynrem jur halor kane ka kam leh riewkhlaw pyrshah ia kane ka longkmie da ki bor pulit ki ba don ha ka uniform.
Na ka liang u president ka AHAM jong ka Dainadubi unit u Nimalson K Sangma u la dawa ban pynioh ia ka hok na ka bynta kane ka lanot bad ruh ban ai ka jingpynshitom ka ba tyngeh pyrshah ia ki briew ki ba donkti ha kane ka kam pyntriem.
Kiwei pat ki ba la ai jingkren ha kane ka jingialang ki kynthup ruh ia u dkhot jong ka Primary Teachers Association northern zone u B S Sangma, ki nongialam ka Garo Students Union bad president CSWO Garo Hills ka Jenny Ningring N Sangma.
Katei ka lanot ka Mousmi Momin ka la shah bom shah tied tyngeh ha ki pulit ka Dudhnoi hadien ba uwei u nongkhaii dewiong u la ujor da ka FIR kam shukor pyrshah ia u kurim jong ka, kata watla kine ki shijur ki la kyntait ia ki jingkynnoh.
