Guwahati, Naitung 07: Ki party liang pyrshah ba kongsan ka Assam, ka Congress bad ka AIUDF ki la kynthoh kylla ia u myntri rangbah (CM) da ka ba kynnoh halor ka jingpyrshang ban pyniaphiah ia ki nongshong shnong ki ba dei ki muslim bad ban leh klet halor ki jingeh ki ba ki paid nongshong shnong ki la mad namar ka jingshlei um da ka jingshim rai ba dang shen da ka kynhun myntri jong u na ka bynta ban pynioh ia ka bhah trai ri ba kyrpang na ka bynta ki san kynhun ki paid muslim ki ba kren ia ka ktien Assamese ha ka jylla, kata ia ka ba ka sorkar kala ong ruh ba ka dei ka sienjam ban don la ka jong ka khanasamari (census) na ka bynta ki trai ri Muslim ha ka jylla.
“Ki kynhun bynriew Khilonjia Muslim ki la shong la sah mynta lah kumba 100 snem hapoh Assam.Ki la pynpaw ka jingsngewkhia halor ka jingduh noh ia ka jingithuh kum ki trai ri hadien ba kiwei pat ki paid Muslim ki la wan shong shnong ha kane ka jylla. Dei na kane ka daw ngi la pynbna ia ki kum ki trai ri Assamese Muslim. Kiwei ruh ki Muslim ki dei ki Assamese bad kim dei ban khuslai,” ong u CM Himanta Biswa Sarma lyngba ki lad pathai khubor ha Guwahati.
“Kine ki san kynhun ki ba dei ki Muslim ia ki ba la ithuh kum ki trai ri ka jylla ki kynthup ia ki Goria, Moria, Jolah ( kata tang kito ki ba shong ba sah ha ki jaka kper slasha) ki Desi bad ki Syed (tang ki kynhun ki ba kren ia ka ktien Assamese .” “Kane ka dei ka polisi halor ka jingpyrshang ban pyniaphiah bad synshar jong ka sorkar jylla. Ka sorkar ka pyrshang ban pyniaphiah ia ki muslim khnang ba ki katto katne ki kynhun muslim lah ban pyndonkam na ka bynta ki jingioh nong sain hima. Ki riti synshar ri ne constitution kam shym la pyniaphiah ia kino kino ki hok na ka bynta ki trai ri,” ong u nongialam ka AIDUF u Aminul Islam.
Ki Muslim ki don kumba 35 percent na ki 3.12 klur ki nongshong shnong ka Assam. Kumba 4% na baroh ki paid muslim hapoh Assam ki dei ki trai ri Assamese muslim bad ki ba bun ki dei ki muslim ki ba kren ia ka ktien Bengali.
Ka jingthmu ba kongsan jong ka BJP hapoh Assam ka long pyrshah ia ki Muslim ki ba kren ia ka ktien Bengali, ia ki ba la ju khot khah khah kum ki nongwan buhai shnong be-ain napoh Bangladesh.
“Katkum ki riew khmih bniah sain hima la ong ba ka la don ka jingpyrshang da ka BJP ban khring ia ki muslim ki ba kren ia ka ktien Assamese. Kane ka long ban leh pynklet halor ki jingeh ki ba ki nongshong shnong ka jylla ki la hap ban mad namar ka jingshlei um ka ba la neh slem slem. Ha ka ba nyngkong to ngin ia khmih mano ba dei ki riewlum hapoh Assam, ai ba baroh ki nongshong shnong ki ba dei ki riewlum kin ioh lang ia kane ka bhah, ngin ym pyrshah ei ei bad hato kane ka jingpynpaw u CM ka Assam kam iahap bad ka nongrim ba la shim da ka sorkar pdeng ha ki rynsan jong ki ri ka pyrthei ka ba la pynpaw lypa ba baroh ki nong India ki dei ki trai ri,” ong u symbud nongialam ka Assam Assembly u ba dei ruh u MLA ka congress u Rockybul Hussain.
