Shillong, Nohprah 11 : U Lamphang ka Iingdorbar Thaw Ain Thomas A Sangma ha ka sngi Palei, ula pynlong ia ka jingjurip ba bniah ia ka Assembly Building Complex ha Mawdiangdiang.
Ha ryngkat ka jingsynran u Symbud Lamphang bad ki Heh Ophisar, u Thomas ula shong bishar kam halor ki jingtei ba dang iaid bad ka jingpynkhreh ia ka jingrakhe lypa ia ka Khristmas ka ban long la 19 tarik Nohprah, ha kane ka jaka ba thymmai.
“Ka kynhun kala peit thuk ia ki jingiaid baroh ki kam bad pynthikna ba ki jingpynbeit ba donkam kila iaid kat kum kaba la thmu” ong u Thomas.
Ka jingjurip kala pynleit jingmut halor ka jingpynpoi bording elektrik kaba la pyntrei da ka Meghalaya Energy Corporation Limited (MeECL).
U Thomas ula iashong jingialang bad ki Heh Ophisar ka MeECL ban pynsted noh ia ka jingpyndait ia u main power line sha ka complex.
“Ngi sngewtynnad ia ka jingiaid sted ki kam bad ka rukom pyntrei ia kane ka project” ong u Thomas haba pynpaw ia ka jingsngewhun ia ka jingiaid ki kam.
U Thomas ula pynpaw biang ia ka jingsngew skhem ba ka jingtei kan sa dep hapoh ka por bala buh da ka High Powered Committee (HPC). Ka main Assembly Hall la buh ban pyndep ha u Jylliew 2026, bad hadien kane yn sa pynlong noh ia ka Dorbar jong ka Iingdorbar ha kane ka complex thymmai.
Kiba la iadonlang ha kane ka jingjurip ki kynthup ia u Symbud Lamphang Limison D Sangma, u Commissioner & Secretary Andrew Simons bad ki Heh Ophisar na ki tnad bapher bapher.
