Shillong, Naitung 27 : Ki nongkiew lum ka Meghalaya ki la lah ban wanrah ia ka nam bad ka burom ia ka jylla hadien ba ki la lah ban leh bha ha ka lympung IMF North East Zonal Sport Climbing Competition 2022 ba la pynlong da ka IMF North East Zone Committee, ha Indian Institute of Entrepreneurship, Guwahati naduh ka 22 tarik haduh ka 24 tarik u Naitung 2022.
Ki nongshim bynta ha katei ka lympung ryngkat ki nongjop ki kynthup ia ka Ngandarihun Sohshang na Mawprem kaba la wan ba lai ha ka LEAD and SPEED climbing, nangta ka Indalin Lyngdoh na Upper Lumparing kaba la wan ha ka kyrdan kaba 10th ha ka liang ki kynthei.
Ha ki shynrang pat, u Teimiki Sungoh na Shangpung u la wan ha ka kyrdan kaba khyndai, bud sa u Keliostar na Lyting Larbri ha ka kyrdan ba 13, Rajeshphar Pdai na Lyting Labri hi ha ka kyrdan ba 15 bad u Ricky Rani na Swer ha ka kyrdan ba 30.
Ha ka thup ki Sub Junior Girls pat ka Dadapbiang Lyngdoh na Laban Presbyterian Higher Secondary School ka la wan ha ka kyrdan kaba nyngkong ha ka SPEED and BOULDERING climbing, nangta ka Iaphilarisa Syiemlieh na Bethesda English Secondary School, Mawiong ka wan ha ka kyrdan kaba ar ha ka LEAD climbing bad ka Pynkmenlang Lyngdoh na Laban Presbyterian Higher Secondary School ka wan ha ka kyrdan kaba lai ha ka LEAD climbing.
Ha ka liang ki Sub Junior Boys pat, u Kyrmenskhem Lyngdoh na Lumparing Vidyapith Secondary School u la wan ha ka kyrdan ba 9 katba u Mebandonlang Umsong na Lyngkyrdem Presbyterian English School u la wan ha ka kyrdan ba 12.
Ha ki Junior Boys, u Balawan Habor Rynjah na Pdeng Raid Border Area Secondary School u la wan ha ka kyrdan kaba 11 katba u Leadingstar Kharbudon na Seng Khasi LP School, Laitlyngkot u la wan ha ka kyrdan kaba 14.
Na ka liang ka MeSCMA ka pynpaw ruh ia ka jingsngewkmen namar ka samla Dadapbiang Lyngdoh Lyngdoh ka la ioh ban khur ia ka kyrdan kaba nyngkong ha ka Speed and Bouldering climbing ha katei ka lympung na ki 98 ngut ki nongiashim bynta kiba wan nakylleng ki jylla jong ka thain shatei lam mihngi jong ka Ri.
Ka kyrwoh na ka kynhun ki nongkiew lum ka Meghalaya, ka ong ruh ba wat la ki samla ka jylla hapdeng ki jingeh ba ki kynduh pynban ki la lah ban ialehkai bha. Ki la kyrpad ruh ia ka sorkar ba kan buh noh da ka jaka kilan met kaba paka ne ki international standard khnang ba ki samla Meghalaya kin lah wat ban pynkhreh aireng wat ha ki lympung National bad International ruh.
Kane ka long katkum ka kyrwoh ba la phah da ka president jong ka synjuk, Kong Malviancy Shabong
