Guwahati, Naitung 27 : Namar la iohi halor ka jingpynslem ban poi sha ka jingshim rai ba khatduh halor ka jingpyrshang ban weng ia ki jingeh jong ki Naga, na ka liang ka NSCN-IM ka la ong ba kane ka jingpynslem ka dei namar ka jingpyrshah jong ka Rashtriya Swayamsevak Sangh (RSS) ia ki artylli ki jingdawa ban don la ka jong ka lama jong ki Naga bad ki riti synshar khadar (Constitution) namar ki mat treikam jong ka ki ba iadei bad ka Hindutva.
Ka NSCN-IM ka la pynpaw ba ia kine ki artylli ki jingdawa la dep ban ia pynbeit hapoh ka Framework Agreement (FA) ba la ia soi bad ka sorkar pdeng ha ka snem 2015 ha ka jingiadon lang u Myntri Rangbahduh (PM) ka ri India u Narendra Modi.
Na ka liang ka NSCN-IM ka la ong, “Ia kane ka mat ka ba iadei bad ka lama bad ka constitution la dep ban ia pynbeit la slem bha, hynrei namar ki mat treikam jong ka RSS (Rashtriya Swayamsevak Sangh) ki la wan hapdeng ban buh jingkylli kumno kin don artylli ki lama bad artylli ki constitution.” Ki mat treikam jong ka RSS/Hindutva ki long pyrshah ia ka nongrim jong katei ka jingiamynjur jong ka FA (Framework Agreement). Ka jingpynslem ka ba kongsan ka la sdang nangne.”
Shuh shuh ki nongialam katei ka kynhun kieng atiar ki la ong ruh ba katto katne ki briew ki la ialam bakla ka ba long ka daw ka jingpynslem ia kane ka jingiakren iasuk, kata namar ka lama bad ki mat ki ba iadei bad ka constitution.”
