Bajali, Naitung 27: Hynnin ka sngi ba Ar arngut ki runar ki ba shong da ka thuk thuk ki la knieh noh ia ka pisa T. 2 lak na kawei ka longkmie hajan Bhattadev University hapoh Pathsala jong ka Assam.
Ia kane ka longkmie ka ba shah lute la tip kum ka Anjali Choudhury ka ba dei na ka shnong Kumarpara ka ba hapoh Bajali District.
Na ka liang ki trai shnong ki la iathuh ba kane ka longkmie ka la mih napoh Union Bank of India hadien ba ka la leit ban sei ia katei ka pisa. Hynrei katba ka dang don ha ka lynti ban leitphai sha la iing ha ryngkat kane ka pisa ka ba ka la thep hapoh ka pla, kine ki runar ki ba la wan da ka thuk thuk ki la wan ieng kynsan hajan jong ka bad knieh noh ia kane ka pla bad jah rngai noh.
Watla ki briew ki ba don marjan ki la pyrshang ban pynsangeh ia kane ka thuk thuk hynrei kim shym la lah satia namar kine ki nonglute ki la pynher sted hadien ba ki la leh ia kane ka kam lute. Halor kane ka jingjia la pyntip ruh sha ki bor pulit ki ba la shim ia la ki jong ki sienjam.
Ki ba kum kine ki jingjia ki la ju jia khah khah ha ki bynta jong ka Bajaji district naduh kine ki khyndiat taiew ba la lah.
Namar kane ka jingkiew jong ki kam pyntriem, na ka liang ki paidbah nongshong shnong mynta ki la dawa jur na ki bor pulit ba kin pynjur ia ka jingpahara bad ruh ban long ki ba peitngor khnang ban lah ban khanglad ia ki ba kum kine ki jingjia.
