Agartala, Naitung 27 :Naduh kine ki khyndiat sngi ba la dep, u Myntri Rangbah (CM) barim ka Tripura u Biplab Deb sa shisien pat u la kylla long ka mat jong ka jingiakren ka ba la saphriang bha.
Ha kane ka kynti ka ba mynta, kam shym la dei satia halor ki jingkren ki ba pynmih kynrum kynram, hynrei namar ka khubor hamsaia ka ba la saphriang kum ka ding halor ki kam sain hima sima hapoh Tripura, kata ha ka ba la kam ba u lah ban shah sospon na ka seng BJP.
U Deb u la hap ban iehnoh ia ka shuki CM ka Tripura namar ki daw ba la tip bha da ki nongialam ba halor jong ka BJP hapoh ka ri.
Ki riew khmih bniah sain hima, ki briew hapoh ka seng BJP bad ki briew ba iajan hapoh ka party ki dang iai bteng ban trud khlieh ban sngewthuh kaei ka ba la pynlong ia ki nongialam ba hakhliehduh ka BJP ba kin shim ia ka ba kum kane ka sienjam ka ba pynkyndit ia ka party BJP hapoh Tripura.
Watla katta la sngewthuh shai ba kane ka khubor hamsaia halor ka jingshah sospon jong u Biplab Deb na ka party ka la wan long ruh namar ki jingkylla ba dang shen ha ka jinglong jingman sain hima.
Hadien ba u la wanphai na Delhi, bad hadien ka jingialang ba la khot pynlong da ki nongialam ba la rim jong ka party bad ki myntri sorkar, une u CM barim ka Tripura u la hap ban iatyngkhuh bad ki lad pathai khubor ki ba la ap khmih lynti ban ioh ia ka jubab na u hynnin ka sngi ba Ar.
Hynrei, pynban u Biplab u la ai da ka jubab ka ba kyllain, kata da ka ba ong, “Ki nongshong shnong ka Tripura bad ka party BJP kin jubab halor kane ka jingkylli.”
Ha ba kylli la ka la don en em ka jingiasylla ka ba la pynkhreh pyrshah ia u, u Deb u la ong, “Ki sngi na ka bynta kito ki ba ngeit ia ki kam iasylla ki la kut noh.”
Ha ka por janmiet, na ka liang u Myntri ka tnat pule puthi ka Tripura, u Ratan Lal Nath u la kyntait halor kitei ki khubor hamsaia bad ong ba ki long ki bym don nongrim.
Kumjuh na ka liang ka myntri ka sorkar pdeng ka Pratima Bhaumik ruh ka la ong, “kine ki dei tang ki jingpynpaw kim dei satia ki khubor.”
