Nongpoh, Naitung 26: Ka All Meghalaya Pradesh Trinamool Congress (AITC) kala pynmih paidbah hynne ka sngi ba-ar ha Maikhuli ban pynsawa biang ia ka sur pyrshah ia ka Memorandum of Understanding (MoU) pynbeit pud bala iasoi hapdeng ka Sorkar Meghalaya bad Assam hakhmat u Myntri kam Pohiing ka Ri, u Amit Shah.
Kane ka jingpynmih paidbah kala jia ruh ha ki kynta ba ki phra ngut ki MLA ka AITC na Jylla lem bad ki MP ka Party ha Lok Sabha bad Rajya Sabha, kila iakhih paidbah hakhmat ka Iingdorbar Parliament ban dawa pyndam ia ka MoU bad ban pynrung noh mardor ia ka ktien Khasi bad Garo ha ka khyrnit kaba phra jong ka Riti Synshar ka Ri.
Kane ka jingiakhih ha Maikhuli, kaba don ha Khappud ka Assam, ka dei kaba la pynlong ha madan jong ka shnong Maikhuli bad ki Nongialam ka AITC kiba la iadonlang ki kynthup ia u Bah James Lygndoh Vice President ka Meghalaya TMC, ka Dr Saralin Dorphang ka ban long kyrtong ka AITC na Mawhati bad kiwei kiwei.
Haba kren hadien ka jingïalang paidbah, u Bah James Lyngdoh, u la iathuh ba kum kane ka jingmih paidbah ha ka jylla Meghalaya la pynlong ha Maikhuli bad Malangkona, ha kaba ki paidbah ki la mih ban pynsawa biang ïa ka jingpyrshah ïa ka MoU ba la ïa soi ban pynbeit pud.
U la iathuh ruh, ba ka AITC ka dawa jur na ka sorkar pdeng ban pynduh pyndam noh ïa ka MoU namar ki paidbah hi kim pat hun halor ka jingpynbeit pud pynbeit hapdeng kine ki ar jylla.
