Shillong, Naitung 26 : Ka National Peoples Party hynne ka sngi ba-ar, ka la pdiang burom ia u Bah Kennedy Khyriem, MLA barim ka Mawphlang bad President ka East Khasi Hills District Congress Committee, uba la wan ban pyniasoh ialade sha ka NPP ban iakhun ia ka elekshon MLA 2023.
We are elated to welcome Shri Kennedy C Khyriem, former MLA to the NPP family. Bah Kennedy has great missions for Mawphlang constituency & shares our vision to work for the people. I heartily welcome him and all his supporters today. pic.twitter.com/3BF4QEhQPH
— Conrad Sangma (@SangmaConrad) July 26, 2022
Ia u Bah Kennedy la pdiang burom da u National president ka party,Conrad K Sangma, kumjuh u National Vice President Bah Prestone Tynsong nalor kiwei ki nongialam ka party, ki MLA bad MDC ka party ha ka jingialang kaba long ha Mawphlang.
Da ki hajar ngut ki paidbah nongkyrshan ka Congress ki la wan ban sakhi lang ia katei ka jingleit pyniasoh jong u Bah Kennedy ryngkat ki nongialam ba hakhmat jong ka Congress ha ka NPP.
U Conrad ba dei ruh u Myntri Rangbah ka jylla haba kren ha ka jingialang u la pynbna ruh ba ka party ka la dep ruh ban rai ba u Bah Kenedy Khyriem un dei u kyrtong jong ka NPP ha ka elekshon MLA ban wan, kaba la wan jia hadien ka jingiapynbeit bad u MDC Bah Lamphrang Blah lem bad u Bah Prestone.
“Watla ngi hap ban bud ia ki kyndon jong ka party hynrei nga pynbna hangne ia kaei kaba la dep ban rai ba u Bah Kennedy un dei u kyrtong jong ka Party ha u 2023 na Mawphlang,” ong u Conrad.
Kumban shu kdew hangne, ha ka elekshon shiteng samoi kaba dang shu lah shen ha u snem ba la dep, u Bah Kennedy u la iakhun na ka tiket Congress bad ioh 8000 tam ka vote katba u MDC ka Congress ba leit pyniasoh sha ka NPP Bah Lamphrang Blah ula ioh 5000 vote. Kine baroh arngut ki la shah rem ha u kyrtong ka UDP, Bah Eugeneson Lyngdoh ba dei ruh u khun jong u MLA ba la khlad noh Bah SK Sun.
Haba bynrap lang, u Bah Prestone Tynsong u la ong ba party ka don ia ka jingkyrmen ba ha ka elekshon MLA ban wan, ka NPP kan ioh ia ka jingjop na ka Mawphlang Constituency namar ba ha ka elekshon shiteng samoi u Bah Lamphrang Blah bad Bah Kennedy ki iakhun pyrshah hynrei mynta ki la donlang bad kumta lada khein ka jingioh vote ruh ka la bun.
“Ngi sngewsnguh ia u Bah Blah uba la len lade ban ailad ia ki kyrtong kiba don ka jingkyrmen ban jop namar u sngewthuh ba lada ki ieng la ka jong ka jong kin ym poi shaei shaei ruh,” u la ong.
Hadien ka jingkren jong u Bah Kennedy, u Myntri Rangbah ha kane ka sngi u la pynbna ha ka jing ialang ba un sa buddien hi dalade ban pynthikna ba ka jingpyntrei ia ka Science and Commerce College kaba don ha Mawphlang bad kumjuh ruh ia ka Tyrsad PHC khamtam eh ban kyntiew kyrdan noh ia ka PWD Division kaba don ha Mawphlang kan sa iaid noh shaid shaid.
