Shillong Iaiong 21: U Additional Deputy Commisioner I/c Pynursla Sub Divison ula bthah ia baroh ki Ophisar kiba donbynta ha ka kam, ban pynieng ia ki jingker bad ban buh ia ki jingmaham ha man la ki bynta jong ka surok kaba la shah kthah jong ka NH-260 bad ban pyrkhing ban ym shah rung ne ban iaid ia ki kali naduh Laitlyngkot shaduh Mawlieh.
“Hadien ba don ka jinghap ki maw ha ka 20 tarik u Iaiong ha ki bynta jong ka Mawlieh ha kaba Arngut kila duh noh ia ka jingim, namar katei ka jingjia, la khang ban kali ban iaid na katei ka surok” pynpaw u Additional Deputy Commisioner I/c Pynursla Sub Divison ha ka kyrwoh.
Namar ka jinglong jingman jong ka suinbneng bad ka jingtih ia ki maw bad ka khyndew ha u lum kan buh ha ka jingma ban twa khyndew bad hap ki maw ka ban buh ha ka jingma ia ka jingim briew bad ia ki jingdon jingem” la pynpaw u ADC.
Kumta ban pynthikna ia ka jingshnain ki paitbah bad ban iada na kino kino ki jingjia ba sngewsih bad ban bteng ia ka jingpynbna paitbah kaba la pynmih 20.04.2026 kumba la hukum ba ka surok ha ki bynta jong ka NH260 naduh Laitlyngkot shaduh Mawlieh kan iai bteng ban khang na kabynta kano kano ka jingiaid ki kali.
“Kane ka jingpyrkhing kan treikam tad haduh ban da lah pyndep ia ka jingleit jurip bad ban pyndep ia ka jingkhmih ia ka jingshngain da ki bor kiba dei khmih ki ban pynthikna ba ka jingshna ia katei ka surok ka long kaba biang ia ki paitbah ban pyndonkam ne ka kaiphod kaba kdew ruh ia ki jingai jingmut ban pynbeit” la ong ha ka jingpynbna.
La bthah ia baroh ki ophisar kiba donbynta ha ka kam ban pynieng ia ki jingker bad ban buh ia ki jingmaham ha man la ki bynta jong katei ka bynta ka surok kaba la shah ktah. Ban buh ia ki briew ban khmih ia ka jingiaid ki kali bad ban khang ia ki ban rung. Ban sam ia ki jingtip sha ki paitbah lyngba ki lad ai jingtip kiba dei.
“Ka tnad pulit, NHIDCL bad ki Kontraktor bad ka PWD (Roads) kidei ban pynthikna ba dei ban pyntreikam pura ia katei ka hukum. Kino kino kiba pynkhein kin shah pynshitom ha ki kyndon jong ka ain.
U ADC ula ong, ba la pynmih ia kane ka hukum na ka bynta ka bha ka miat bad ka jingshngain jong ki paitbah bad kan iai bteng ban treikam tad haduh ban da pynmih da kumwei pat.
