Shillong, Rymphang 22: U Myntri Rangbah ka jylla u Conrad K Sangma hynnin ka sngi Balang ula iathuh ba ka sorkar jylla kala pynlut T.12 lak man la ka bnai na ka bynta ki 175 ngut ki Political Appointee (ki briew ba thungkam da ka Party kaba don ha ka bor Synshar kum ki Chairman, Co-Chairman, Vice Chairman ter ter) haduh mynta.
“Kine kim da ktah than ia ka jingpynlut pynsep,” ong u Conrad Sangma haba iakren bad ki nongthoh khubor.
Ula ong hadien ba la khmih bniah ia ka jingai jingmyntoi ia ki Political Appointee bapher bapher, ka sorkar ia mynta ka siew malu mala kaba tam ia ka T.12 lak bad da kaba leh kumtei, kala lah ban pynrung sa 50 ngut ki briew.
Kine ki Political Appointee kidei na ki seng saiñ pyrthei ki bapher bapher kiba kyrshan iaka sorkar kaba ialam da ka NPP bad kidei na ka seng Bharatiya Janata Party (BJP), United Democratic Party (UDP) bad ka Hill State People’s Democratic Party (HSPDP).
U Conrad Sangma ula ong ba kam don kano kano ka jingbakla ha kaban thung ia ki Political Appointee namar kadei kaba don beit ha man la ki sorkar bad ka jia ha man la ka rukom treikam.
Ula ong, ba kadei ka lynti kaba pyndonbynta ia ki nongialam saiñ pyrthei na ki shnong ki thaw.
“Kaei kaba kongsan ia baroh ban kylli kadei halor ka jingtreikam jong kitei kiba shah thung bad ka jingtreikam jong kitei ki Board. Ka jingthung kadei kaba ngi hap ban leh bad ngi lah leh, ngi kwah ban pyndonbynta lang ia baroh ki briew na ki shnong ki thaw, ngi kwah ban pyndonbynta lang ia baroh ki nongialam saiñ pyrthei ha ka rukom treikam. Hynrei kumba nga la ong, kadei pat ban long ba kidei ban treikam bha” ong u Myntri Rangbah.
Ula iathuh ba ar taiew mynshwa, ula lum ia ka jingialang bad ka Employment Generation Council bad bthah ba kidei ban phah ar ne lai tylli ki jingtyrwa ban wad ia ki lad ki lynti ban thaw ia ki lad aikam aijam.
“Nga la don ruh ia ka jingialang bad kiwei pat ki Boards kum ka MIDC, MTDC bad kiwei kiwei. Nga long uba treikam bha ha kaban pynthikna ba kim dei ba kin shu shah thung hynrei kidei ban trei ban pynmih ia u soh” ula ong.
