Shillong, Rymphang 15 : Ka Meghalaya Lokayukta kala pynlut haduh T. 1,07,71,366 ha ka shisnem na ka bynta u snem 2022-2023.
Napdeng kane, T. 48,75,902 la pynlut sha ka tulop jong u Chairperson, Director of Inquiry bad Director of Presecution bad ka Enquiry/Investigation Officer, T. 19,40,202 ia ka tulop ki nongtrei casual, T. 29,54,672 ka jingpynlut ha Ophis, T. 4,12,270 ka bai wai ophis bad ka bording, T. 2,47,820 ia ka bai iasaid ain bad T. 3,40,820 kiwei kiwei ki jingsiew.
Ia kane la pyntip da u Secretary ka Meghalaya Lokayukta R Rapthap ha ka jubab bala ai ha ka 9 tarik Rymphang halor ka jingpan jingtip jong ki arngut ki Longkmie ba trei monsngewbha ka Jylla-Kong Angela Rangad jong ka TUR bad Kong Agnes Kharshiing President ka CSWO hapoh ka Rights to Information Act, 2005.
Ka jubab ka pyntip ba T. 43,52,240 la pynlut ha u snem 2021-2022, T. 1,01,60,617 ha u 2020-2021 bad T. 85,39,627 jong u snem 2019-2020.
Kat kum ka jubab u Secretary, kat haduh mynta ka Meghalaya Lokayukta ka dang pyntrei da ki nongtrei casual kiba la siew bnai kat kum ka jingpynbna jong ka Tnad Labour ka Sorkar Jylla. Ka jingthung ia kine ki nongtrei casual ka dei kaba la leh da ka jingai jingmynjur jong ka Sorkar.
Kine ki kynthup : 1 LDA cum Accountant, 1 DEO, 1 Stenographer Grade III, 3 peon/bunglow peon, 3 drivers, 1 sweeper, 1 chowkidar, 1 cleaner.
Ka jubab la pyntip ruh ba ym shym la thungkam contract iano iano ruh hapoh ka Meghalaya Lokayukta.
