Kohima, Nailar 10 :Ka Eastern Nagaland Peoples’ Organisation (ENPO), hynnin ka sngi ba Ar ka la pynlong da ka jingiaid rally paidbah ban dawa la ka jong ka jylla.
Ia kane ka jingiaid paidbah la pynlong ha ki hynriew tylli ki district ka Nagaland ban dawa na ka bynta ban thaw ia la ka jong ka jylla ia ka ban tip kum ka “Frontier Nagaland”.
Da ki spah ngut ki briew ki ba dei ki trai shnong na ka thain mihngi ka Nagaland ki la ia mih paidbah ban iashim bynta ha kane ka jingiaid paidbah ba la khot pynlong da ka ENPO.
Ka ENPO ka dei ka kynhun seng ka ba hakhliehduh na ki hynniew tylli ki kynhun seng jong ki trai shnong ha Mon, Tuensang, Kiphire, Longleng, Noklak bad Shamator district ka Nagaland.
Ka ENPO ka la kam ba ki jaka ki ba la mihkhmat da kane ka seng ki dei ki ba la shah iehbein ha ka ba iadei bad ka roi ka par, ka pule puthi, ki lynti surok bad kiwei pat ki jingdonkam ba kongsan.
Ha kane ka sngi pynlong rally baroh ki jingtreikam naduh ki jaka pule bad kiwei pat ki ophis treikam ki la khang khyrdep lut ban pynpaw ka jingiatylli halor ki jingdawa jong ka ENPO na ka bynta ban don noh la ka jong ka jylla.
Na ka liang ki nongmihkhmat ka ENPO ki la aiti ruh ia ki memorandum halor kane ka jingdawa ka jong ki ban don noh la ka jong ka jylla sha ki deputy commissioners jong ki district.
