Shillong, Nailar 12 : Kum shi bynta ban don ka jingiajan bad ka imlang sahlang, ka 2nd Megh Battallion NCC hynne ka sngi ka la pynlong ia ka jingai snam sngewbha ha ryngkat ka jingiatreilang bad ka Red Cross Society Meghalaya kumjuh ruh bad ka Regional Blood Bank.
Ha kane ka prokram la donlang ruh u Bah RO Wallang IFS Retd, Chairman jong ka Red Cross Society kum u Kongsan nangta u Bah A.N. Sawian Gen Secretary ka Indian Red Cross Society kiba la pynsngewthuh ia ki dkhot shaphang ka jingkordor ka jingai snam ei.
Kine ki Heh ka Red Cross ki la Ïaroh ruh ia ki nongiashim bynta ha kaba ai snam da kaba ong ba ki leh ia ka kam kaba bha tam na bynta ka imlang sahlang.
Ha kane kajuh ka sngi la ioh ruh ka jingpynshai paidbah na ka Dr. C Budnah jong ka Regional Blood Bank kaba la batai bniah shaphang ka jingkongsan haba iadei bad ka jingai snam ei.
Na ka liang u Brig Jai Singh, Group Commander jong ka Shillong Group u la ban jur halor ka kamram jong ki NCC haba iadei bad ka jingnoh synniang bad ka jingdon bynta bad ka imlang sahlang. U kyntu ruh ia ki ba ki dei ruh ban long kiba kloi ban ai snam ei.
Ha kane ka sngi ki la don haduh 35 ngut ki dkhot jong ka NCC kiba la wan ban ai sngewbha ia ka snam kumjuh ruh na ki nongtrei bad PI jong ka Shillong Group.
