Shillong, Nailar 12: Ka seng Hynniewtrep National Liberation Council (HNLC) hynne ka sngi kala pynpaw ia ka jingkyrmen ba ka jingiakren iasuk hapdeng ka Seng bad ka Sorkar kan wanrah ia ka jingkylla ha ka synshar khaddar ka ban pynkupbor ia ka Jaidbynriew Hynniewtrep.
“Ngi don ka jingkyrmen ba jingiakren iasuk hapdeng ka India-Hynniewtrep kan wanrah ia ka jingkylla ha ka synshar khaddar bad kan ai jingmyntoi ha kaban pynkupbor ia ka Jaidbynriew Hynniewtrep jong ngi” ong u General Secretary –cum-Publicity Secretary ka HNLC Bah Sainkupar Nongtraw ha ka kyrwoh.
Haba pynpaw ba ka jingialeh jong ka HNLC ka dei ka kam synshar khadar, u Bah Sainkupar ula ong “Ngi donkam ban wanrah ia ka lynti iapynbeit lyngba ka synshar khadar khnang ba kan weng noh ia ki jingeh bala iakynduh da ki briew jongngi na ka por sha ka por”.
Ka HNLC kala kynmaw burom ruh ia ka jingim bad ka nam jong u General Secretary barim Bah Cheristerfield Thangkhiew ha ka lyngkhuh sngi iap ba nyngkong jong u.
“Mynta ka dei ka lyngkhuh sngi iap ba nyngkong jong u Bah Cheristerfield Thangkhiew, General Secretary barim ka HNLC. Ki bor pahara kila pyniap ia u ha kane ka sngi jong u 2021 hynrei kim shym la lah ban pynlip ia ka ding jong ka jingieid ia ka Jaidbynriew ba ula pynrung ha ki dohnud jong ki paid ka Bri u Hynniewtrep” ong ka HNLC.
“U Bah Che u dei uwei na ki riewshlur ka jaidbynriew Hynniewtrep. Ngi salute ia u. Ka HNLC ka kynmaw burom ia ka jingim bad ka nam u Bah Che halor ki synniang bad jinglen lade….Im slem bah Che, Im slem HNLC” ula ong.
Ka HNLC kala ong pat ba mano mano ba kloi ban iap ha kaban iada iala ka jong ka jaka na ka jingwan buhai beain bad jingthombor u dei u riewshlur. Mano mano ba long uba khreh ban iap ha kaba iada ia ka hok jong ki briew lajong u dei u riewshlur, mano mano ba long bala khreh ban iakhun bad len lade n aka bynta ka jinglaitlud ka Ri u dei u riewshlur.
Ha ka jingrakhe 35 snem ka jingkha ia ka Seng, ka HNLC kala ai ka jingkhublei ia baroh ki Dkhot naduh ki shipai bad ki Political Wing lem bad ki Nongialam kiba la shah pynkhamti ia ka kam ban pyntyllun shakhmat ia ka jingiakren iasuk.
Ka HNLC ka dei ka seng kaba la thaw ha ka 14 tarik Nailar, 1987.
“Ka HNLC ka kwah ban ai khublei ia ki bahaiing hasem jong baroh ki Dkhot. Khamtam jogn kito ki Longiing kiba la duhnoh ia la ki jong ki Khun ki Kti ha kane ka jingialeh ka seng” kala ong.
Ka HNLC kala pynpaw ia ka jingsngewnguh ia baroh ki Sengbhalang ka Bri u Hynniewtrep bad ia baroh ki Khun ki Hajar ka Bri u Hynniewtrep Hynniewskum.
