Shillong, Lber 14: Ka jylla Meghalaya ha ka sien kaba nyngkong eh, kala pynlong iaka International Film Festival hynne ka sngi bad ia kane ka tamasa la pynlong da ka Meghalaya Filmmaker’s Association ha ryngkat ka jingiatreilang bad ka Meghalaya Tourism.
La plie pyrda ia kane ka Film Festival da u Myntri ka sorkar jylla uba khmih iaka tnad Arts & Culture u Bah Paul Lyngdoh kum u kongsan ha ka jingialang kaba la long ha Soso Tham Auditorium, Shillong.
U Bah Paul Lyngdoh haba kren ha ka jingialang ula ong, ba la tip ia ka jylla Meghalaya kum ka jaka kaba dap u lyoh hynrei kadei ruh ka jaka kaba don kyrhai ia ki sap ki phong.
Ula ong, kane ka International Film Festival kadei ka jingrakhe jong ka jylla ia ka jinglah ban pynmih ia ki tyngshop ki puron bad ka jingdon ia ka sap ha kaban pynmih ia ki film kaba ailad ia ka jylla ban aireng wat ha ki rynsan kiba heh jong ka ri bad shabar ri ruh kumjuh.
U Myntri Sorkar ula ong, kane ka tamasa kadei ka lad ban pyninam ia ka jingriewspah iaka kolshor bad ka jingdon ka jylla ia ki jaka jngohkai kiba itynnad bad ula pynshlur ia ki samla ba kin ioh jinghikai bad ban ioh mynsiem lyngba katei ka film festival, kaban iarap shibun ia ki ha kaban pynkylla ia ka dur ka dar ha ka rukom pynmih ia ki film haka jylla.
Ula banjur ba ka sorkar jylla kan ialeh ban tei iaki Cinema Hall kiba paka kaban kyntiew shuh shuh ia ka jingshna ia ki film ha ka jylla.
Lah ban kdew ba iaka 1st Meghalaya International Film Festival kan bteng ban long ha kine ki 5 sngi ha ki 4 tylli ki jaka ia kaba yn pyni ne screen ia ki 40 tylli ki film ha katei ka tamasa.
