Shillong Jylliew 21: Ka HCL Tech hynne ka sngi Thohdieng kala pynlong ia ka HCLTech Grant Pan-India Symposium 2024 kaba saw ha North-Eastern Hill University, Shillong, halor ka matpdeng ‘Ka bynta jong ka CSR ha ka roi ka par ha ki jaka ba kyndong jong ki jylla shatei lam mihngi jong ka Ri India’.
“Ka thong ba khraw jong ngi ka long ban noh synniang sha ka roi ka par jong ka imlang sahlang kaba ngi shong ngi sah bad ka HCLTech Grant kadei ka lad ba ngi ai ka jing iatreilang ryngkat bad ki sengbhalang, seng trei mon sngewbha da kaba don ia kajuh ka thong. Ka Symposium kala pynshisha ba ka long kaba kongsan tam bad kala ai ka lad ia ngi ba ngin ia kynduh ia ki seng bapher bapher ban iatai ia ki mat ba jwat bad kiba donkam” ong u Dr. Nidhi Pundhir, Vice President, Global CSR, HCLTech and Director, HCLFoundation.
Ula ong ruh ba u dap da ka jingkmen ba ki sengne NGO kila phah ia ki jingai jingmut bad ban iatrei lang ban wanrah shibun ki jingkylla ha ka imlang sahlang.
Kane ka Symposium ka don ia ka jingthmu ban wanrah ia ka jingiadei hapdeng ka HCLTech Grant bad ki NGO bapher bapher bad lyngba ka “Edition kaba 10 jong ka HCLTech Grant India” yn ai ia ka song tyngka kaba T.16.5 Klur sha ki 9 tylli ki NGO, kiba shah jied lyngba ka jingpyniaid kaba khlain, kaba shai bad ba long laitluid kumba ju leh ha ka rukom synshar paidbah.
Lai tylli ki NGO kin ioh mar T.5 Klur na ka bynta ki Project jongki kaba saw snem ha ka liang ka jingkoit jingkhiah, ka pule puthi bad ka Mariang bad Hynriew tylli ki NGO kin ioh ia ka song tyngka kaba T.25 Lak na ka bynta ki project kaba shi snem.
