Nongpoh, Jylliew 21 : Katba ka pyrthei ka dang khuslai ia ka jingkylla ka suinbneng namar ka jingjot lut ki khlaw ki btap, uwei u samla rangbah na Nongpoh, ula mih shakhmat ban tynrong halade ia ka jingkitkhlieh ban pynkhie im pat ia kawei ka khlaw jong ka Raid Nongpoh bad ban sumar bad ai jingiada ia ki jingthaw ba im ha kane ka khlaw.
Une u samla rangbah u dei uba la tip kyrteng u John Rymbai uba dei na ka shnong Mawroh, Nongpoh. Une u samla rang bah u dei uba la pawkhmat bha na ki kam bapher bapher ba ula leh ha kaban shakri ia ka imlang sahlang bad u dei uba ju mih bha ha ki lad pathai khubor, ki rynsan social media bad kiwei kiwei.
Da ka jingmynjur jong ka Raid Nongpoh, une u Samla ula mih shakhmat ban shimti halade ia ka kam ban sumar bad pynkhie im ia ka khlaw jong ka Raid ha u lum bala tip kum u Lum Wyrtoh, kaba ki nongshongshnong ki ju tip kum u Lum Knia ba la khein kyntang da ka Raid Nongpoh bad ka Dorbar Shnong Nongpoh.
Ha u snem 2022, u John Rymbai ula shimti ban sumar bad khmih ia une u lum jong ka Raid kaba jngai tang kumba 1.5 km na surok bah bad ula sdang ruh ban thung dieng ban pynrben biang ia une u lum kum ka khlaw. Ula thung ia ki dieng bapher bapher kynthup ki diengsoh ki ban ai jingmyntoi ym tang ia u khun bynriew hynrei ia ki mrad ki mreng, ki sim ki doh kiba don ha kane ka khlaw.
Lah ban kdew hangne ba kane ka khlaw ha u Lum Wyrtoh ka dei kaba don markhap bad ka Nongkhyllem Wilflife Santuary, kaba sumar bad khmih da ka Tnad Wilflife ka Sorkar Jylla.
Dang ha kine ki arsngi bala leit noh, u John Rymbai ula leit ban pyllait biang ia u mrad ‘Bangsoh’ ba dang khyllung, ia uba la ioh ban pyllait im dang shen na ka thain.
Une u mrad ‘Bangsoh’ u dei uba ju khot da ki nongshongshnong ka thain Nongpoh hynrei ha ka ktien nongwei la tip ia u da u slowloris.
U John Rymbai ula sumar hi dalade ia une u khun Slowloris bad peit thuh ia ka jinglong jingman jong u tad haduh ba ula ibit ban pyllait biang sha khlaw ban heh un san bad iashem bad la ki jong ki jait jingthaw.
