Shillong, Naiwieng 19: Ka Goethe-Institute Kolkata haka jingiatreilang bad ka tnat pule Germanic Studies bad ka Linguistics jong ka skulbah English and Foreign Languages University (EFLU), Shillong kala pynlong iaka ‘International Symposium on Multilingualism’ halor ka phang ‘Crossing Borders: Innovations for a Multilingual Environment’.
Kane ka jingiatai ka la plie lad iaki nonghikai lane ki professor jong ka ri India khamtam napoh ka thain Shatei Lam Mihngi bad ka ri Germany bad iatai bad ban ia phylliew jingmut halor ka ktien thylliej jong ki rit paid ka thain Shatei Lam Mihngi.
Ia kane ka jingiatai la pyniaid daka Rebekah Tham ka khlieh tnat pule Department of Germanic Studies ka ba la kren halor ka jungbun jait ki ktien tynrai rit paid hapoh ka thain baroh kawei bad kumjuh ruh kala batai halor ka jingdonkam ban nang ka ktien German bad kiwei kiwei de.
Naka liang ka Educational Cooperation Officer jong ka Goethe Institut ka Anita Mitra ka la ong ba baroh ki ktien ba kren hapoh ka pyrthei kidei kiba pynithuh iala ka jinglong tynrai ki briew ba kren ha sytllak ka pyrthei.
Ka Anita Mitra kala ong watla ka long ka jingdonkam ban nang ruh kiwei ki ktien haka juk ba mynta hynrei ka donkam ruh ban pynneh pynsah iaki ktien namar ki long ki jingithuh ia kiwei na kiwei pat.
Ka la ong ba ka jingnang bad jingsngewthuh ia kiwei ki ktien ka pyniajan iaki briew bad kiwei pat bad kane ka long ka ba donkam naka bynta ban kyntiew para briew bad kane ka pynjanai ruh iaki briew ba ka donkam ban pynneh iala ka jong ka ktien.
Ha kane ka sngi la ioh ruh ka jingkren na u Dolon Gupta u Co-founder jong ka Business Communication Facilitators Association of India (BECFAI) bad na u Miguel Rezzani jong ka Goethe Institut Berlin.
