Shillong, Nailur 3 : Ka Rangdajied United FC ka la pynliem haduh 4-0 kol ia ka Malki Sports Club ha ka lympung ialehkai jong ka Shillong Premier League kaba long hynne ka sngi Saitjaiñ ha madan Third Ground Polo.
Ia kitei ki saw tylli ki kol jong ka Rangdajied United FC la ioh ban thep da u Dibor Kassar ha ka minit kaba 28 bad ha ka minit kaba 61 nangta u Knerktilang Buam ha ka minit ba 78 bad ruh na u Raikutshisha Buam ha ka minit kaba 89.
Na ka liang ka Malki watla ka iakhun tyngeh hynrei ka khlem lah satia ban pynphai wat tang shi kol ruh tad haduh ban da kut ka por ialehkai.
Da katei ka jingjop ka Rangdajied FC mynta ka don ha ka kyrdan kaba lai hi namar watla ki don mar katjuh ka jingkamai point bad ka Langsning hynrei namar ka jingiapher ha ka jingthep kol ka Langsning ka la ioh ban don ha ka kyrdan kaba ar.
Haba phai pat sha ka Malki katei ka kynhun ka la neh ha ka kyrdan ba ar na trai katba ia ka kyrdan ba nyngkong haduh mynta la ioh ban bat beit da ka Mawlai kaba don mynta da ki 29 point katba kaLangsning pat kaba don ha ka kyrdan kaba ar ka don 21 point ryngkat bad ka Rangdajied United FC .
Ka jingiakhun kaba bud pat kan long ha ka 08tarik mynta u bnai hapdeng ka Nangkiew Irat pyrshah ia ka Shillong Lajong FC.
Ka Shillong Lajong ka don mynta ha ka kyrdan kaba 6 ha ka miej khein point katba ka Nangkiew Irat pat ka don ha ka kyrdan kaba san da ki 13 point katba ka Shillong Lajong pat ka don da ki 11 point.
