Shillong, Nailur 03: U Myntri khynnah ka sorkar pdeng uba khmih iaka Culture and Parliamentary Affairs u Arjun Ram Meghwal hynne ka sngi, ula pynkynmaw ia u synniang ba la ai da ki Khlaw Wait ka jylla ha ka jingiakhun ban pynioh jinglaitluid iaka ri India.
Haba iashimbynta haka prokram “Ka Tynrai Jong Ka Longrynieng” (The Roots of Identity) kaba la long ha SosoTham Auditorium, u Ram Meghwal u la ong, “Ka kyrteng jong u Tirot Sing kadei kaba pawnam bha bad baroh kidei ban tip shaphang jong u”.
U la pynkynmaw ia u synniang jong u Tirot Sing, Kiang Nangbah bad u Pa ToganSangma bad kiwei kiwei ki riewshlur haka jingiakhun jong ka ri ban ioh iaka jinglaitluid.
Ula ong, ka sorkar ka don iaka jingthmu ban ai jinghikai ia ki khynnah halor ki riewshlur kiba la iakhun ha kaban ioh iaka jinglaitluid bad ula ai jingbatai ruh halor ka phang Azadi Ka Amrit Mahotsav.
U Myntri ula iaroh ruh iaka jingshimkhia jong ka Shillong Law College bad ka Positive Energy Art Foundation ban pynlong iaka cultural program ban kyntiew iaka Art & Culture jong ka jylla bad ula kyntu ia ki samla ba kin bteng ban rakhe man la u snem iaka Har Ghar Tiranga bad ula rwai ruh iaka jingrwai kaba la thaw hi halor ka Har Ghar Tiranga.
Ka MLA jong ka East Shillong ka Kong Ampareen Lyngdoh kaba la wan ban iashimbynta ha katei ka prokram, kala kyntu ia ka sorkar Pdeng ban ai jingithuh noh iaka Ktien Khasi, Garo bad Jaintia bad kala pynpaw iaka jingsngewtynnad halor ka jingshimkhia ka sorkar ban pyn sngewthuh iaki khynnah shaphang ki riewshlur ka ri.
U Meghwal u la sam ruh ia ki khusnam sha ki nongjop ha ki jingiakob bapher bapher bad la pynlong ruh iaka prokram ha kaba la pyninam iaka jingshad tynrai jong ki jylla ka thain shatei lam mihngi.
