Shillong, Nailur 03: Ka Bharatiya Janata Party (BJP) kam pat weng satia ia ka jingthungkam ia u MDC ba shah kem jong ka Tura Bernard N Marak, kum u Vice President ka party.
Haba pyntip ia kane hynne ka sngi saitjain, u National Vice President ka BJP ba khmih ia ka Meghalaya Dr Chuba Ao ula ong “Ngim pat pynmih satia ia ka hukum weng kam namar kane ka kam ka dang don ha ka jingbishar ka Iingkashari”.
“Kat haduh mynta, kane ka kam ka dang don ha ka jingbishar ka Iingkashari, ai baka Iingkashari kan ai ia ka jingbishar kaba hok bad hadien kata ngin sa shong pyrkhat” ula ong.
Haba ban jur ia ka jingdawa ka party ban thung ia ka jingohkit ba laituid halor ka jingjia ba lam sha ka jingkem ia u Bernard, u Dr Ao ula ong “Ngi la dep dawa ia ka jingtohkit namar shiliang ka dei ka sorkar bad shiliang ka dei ma u marwei”.
Haba pynpaw ba ki briew ka ain kim dei ban shah liang, une u Nongialam ka BJP ula ong “Haba ki don ha ka shuki, ki lah ban khyrwait katba mon iala ka kti”.
U Dr Ao u ong ba ka BJP ka dang pyrshang ban wad ia ka jingshisha halor ka jingkem ia une u Nongialam haba pynpaw ruh iaka jingsngewskhem ba tang ka Iingkashari ka dei ka nongbishar ban pynthikna ia ka jingbishar kaba hok.
U Bernard ula shah kem halor ka jingkynnoh ba u pyniaid ia ka ktem khaii met ha ka farm shimet jong u bala tip kum ka Rimpu Bagan. Hynrei ka BJP kala kynnoh ba ka dei tang ka kput politics jong u Myntri Rangbah ka Jylla.
