Shillong, Nailar 23: Ka kynhun ialehkai jong ka Langsning ka la mad ia ka nam rem ha ka jingiakhun jong ka kylla kaba ar ka Shillong Premier League da kaba shah rem noh da 1-0 kol ha ka Nangkiew Irat ha ka jingialehkai kaba shongshit bha kaba long hynne ka sngi ha madan Third Ground Polo.
Da katei ka jingjop mynta ka Nangkiew Irat ka la don mynta ha ka kyrdan kaba 6 da ki 10 point katba ka Langsning pat ka neh ha ka kyrdan kaba ar da ki 18 point.
Ia ka kol jop jong ka Nangkiew Irat ha kane ka sngi laioh ban thep da u Shaibor Nongrum ha ka minit kaba 80 jong ka kylla miet hadien ba ka jingiakhun ha ka kylla step ka la kut noh khlem da don mano mano ruh ba ioh ban thep kol.
Lah ban kdew hangne ba ha ka kylla kaba nyngkong kaba long ha ka 22tarik Jylliew, ka jingiakhun hapdeng kitei ki arliang mamla ka la kut ha ka jingiakhaid da mar 2-2 kol.
Ka jingiakhun kaba bud pat kaban long ha kane ka sngi Thohdieng, kata ha ka 26tarik kan long hapdeng ki klob kiba don sha trai duh, kata hapdeng ka Malki kaba don da ki 7 point pyrshah ia ka Mawkhar SC kaba don da ki 3 point. Kumban shu phai dien ka Malki ka la ioh ban khur ia ka jingjop kaba nyngkong na ki ar tylli ki jingjop ha ka jingiakhun ia ka Mawkhar kaba long ha ka 24tarik u Jylliew.
