Nongstoiñ, Nailur 17: Ka shnong Lawrynjam kawei na ki shnong kiba don ha ka thaiñ Parïong, kaba hap ha Mawthadraishan C&RD Block Eastern West Khasi Hills District, ka dei ka shnong ka bym pat don surok satia haduh mynta bad kaba jngai kumba saw kilomitar ei ei na ka shnong Dommawlieh Parïong.
Ka jingbym pat don surok ban pynpoi sha katei ka shnong, ka la buh ïa ki paidbah ha ka jingeh ha ka kit ka bah, ka leit ka wan bad khamtam haba don kiba pang kiba shitom ban pynpoi sha ki jaka sumar kum ha Parïong PHC, Kynshi PHC sha Mairang bad sha kiwei kiwei ki jaka sumar. Nalor kata ki khynnah skul na katei ka shnong ki shem jingeh bha ha ka por lyiur, namar ki hap ban kam lyngba ïa kawei ka wah duid kaba tuid lyngba ka kharai pynthor kba bad lada dei ha ka por slap lei lei ka um ka heh bha.
Kumta na ka liang ki nongïalam ka Hynñiewtrep Youth Council Mawthadraishan circle, hadien ba ki la ïoh ïa ka jingkyrpad na ki paitbah shnong, ki la shimkhia bad dang shen ki la aiti ruh da ka jingthoh ban kyrpad ïa u EE ka tnad PWD Mairang, ban un ïakren bad ka sorkar ba kan phai khmat lem sha katei ka shnong, da kaba mang pisa na ka bynta ban shna surok, khnang ba ki paitbah kin lait na ki jingeh.
U bah Shembor Langrin secretary ka HYC Mawthadraishan circle haba ïakren bad u nongthoh khubor, u la ong ba katei ka jingleit ïakynduh jong ki ïa utei u heh sorkar ka long kaba seisoh, namar ba u la kular ha ki ba shen un sa phah ban leit sorbe ïa ka surok bad ynda ki nongsorbe ki la dep, un sa phah ïa ka proposal sha ka sorkar ba kan leh ïa kaba donkam.
Utei u nongïalam ka seng u la kyntu ruh ïa u MLA ka thaiñ u ba dei ruh u Myntri ha kane ka sorkar MDA, ba un shimkhia bad phai khmat lem sha katei ka shnong bad kin sa leit ruh ban ïakynduh ïa u ban ïaphylliew jingmut kumno yn leh. U la kyntu ïa ki paidbah jong katei ka shnong ba kin ïaishah shipor, haduh ba ka ophis jong u EE ka PWD kan da lah ban pynbiang ïa ki kot ki sla ban phah sha ka sorkar, na ka bynta ba kan mang pisa ban shna surok haduh katei ka shnong.
