Shillong, Naitung 10 : Ka Sorkar Jylla ha ka sngi Balang kala mynjur ia ka jingpynkylla thymmai ia ki kyndon jong ka Meghalaya Day Award.
“Ngi la wanrah ia artylli ki jingpynkylla halor kane. Kaba nyngkong ka long ba ngi la rai ban nang pynheh ia ka khusnam pisa na ka T. 1 lak sha ka T. 2 lak. Kumba phi iatip, kane ka dei kaba la leh khatduh ha u snem 2013” ong u Myntri Rangbah ka Jylla Conrad K Sangma haba iakren bad ki lad pathai khubor hadien ka jingialang jong ka Kynhun Myntri.
Ula uathuh ba kawei pat ka rai bala shim ka long ka jinglah ban aplai online, kaba mut ba kam dei shuh kaba hap ban phah lyngba ki Tnad.
“Mynta ki briew ki lah ban phah kyrteng ia kiwei pat lyngba ka kor online kumba la leh ia ka Padmashree bad kiwei ki National Award” ula ong.
Ha kajuh ka por, ka Kynhun Myntri kala ai jingmynjur ruh ia ka Meghalaya Right to Public Service Rules, kaba thmu ban pynthikna ba ka jingai jingithuh (acknowledgement) ia ki aplikeshon ka dei ban pyndep hapoh ka 7 sngi.
“Ngi la ai ka jingmynjur ban pynkylla ia ka Rule 7 jong ka Meghalaya Right to Public Service Rules” ong u Myntri Rangbah ka Jylla.
