Shillong, Naiwieng 26 : Ka Sorkar Jylla kala ai jingmynjur ban wanrah jingpynkylla ha ka Meghalaya Investment Promotion Policy, kaba thmu ban nang pynsuk ia ki kam ki jam bad pynshlur ban seng karkhana da ki trai Jylla.
U Myntri Rangbah ka Jylla Conrad K Sangma ula ong ba ki jingkylla ki kynthup ia ka jingbatai pat da kumwei ia ka micro enterprises, pynduna ia u pud kynshew pisa na ka T.50 lak sha ka T.10 lak ban pynmyntoi ia ki nongsengkam trai Jylla.
Ka jingpynkylla kan pynthikna ruh ia ka jingbteng ki jingioh jingmyntoi ki nongkynshew kam kiba seng ia ki karkhana hapdeng ka por ba treikam ka Industrial Policy barim bad ka MIIPA policy ba thymmai.
“Ngi la wanrah ia ki jingpynkylla kiba donkam ban pynbeit ryntih ia ka policy jong ngi bad ban pyniahap kyrdan ruh ia ki policy jong ngi bad kaei kaba jia ha kylleng ka Ri bad kaei kaba jia khamtam ha ki Jylla ka thain Shatei Lam Mihngi” ong u Conrad.
Kat kum ka jingong jong u, ki jingpynkylla ki thmu ban nang pynkhlain ia ka jingsngewskhem ki nongsengkam bad ban kyntiew ia ka jingkynshew ha ka Jylla.
