Shillong Nailar 07: Ka kynhun Myntri ka Sorkar Jylla kala ai jingmynjur ban wanrah ia ki jingpynkylla ia ka Meghalaya Excise Rules, da kaba wanrah ia ka jingpyrkhing halor ka jingpynmih ia ka kyiad pyrsi (Country Liquor) bad ban pynduna noh ia ka kyrdan jong ki Bonded Warehouses na ka lai tylli sha ka ar tylli.
Haba iakren bad ki nongthoh khubor, u Conrad K Sangma ula ong ba kine ki Rule kiba thymmai kin ailad ban pyrkhing ia ka jingpynmih ia ka kyiad pyrsi, kan plie lad ia ki nongsengkam lajong ban kyntiew ia kane ka jingdih tynrai ka jylla.
La pynwandur ia kane ka rukom treikam khnang ba kan ai jingbit ia ki riewshimet bad ia ki kynhun kiba don ia ka jingthrang ha kaban pynmih ia ka kyiad pyrsi.
“Ha ki snem kiba la dep, kam shym la don kano kano ka jingpyrkhing ia ki, kumta ngi lah thaw ia ka rukom treikam ban pyrkhing noh ia ka jingpynmih ia ka kyiad pyrsi” ong u Sangma.
“Suki suki, ngi ngin sa pyndonbynta ia kiwei pat ban leh ia ki Distilled ne kaba la saiñ bha namar ia kane ka kyiad kaba la saiñ bha kadei ruh kaba la leh ha ka kyrdan jong ki khlieh nongsynshar, kumta kito kiba donkam ban pyndonbynta ia bun ngut, hynrei ia ka jingpynmih ia ka kyiad kadei kaba la leh ha ka lynti kaba rit bad kaba heh bad mynta ki nongsengkam ki don ia ka jingthrang ban pynlong ia kane ha kabanpyniaid iew ha kata ka rukom ban kyntiew ruh ia ka kam jngohkai. Kumta kine kiei kiei baroh kadei kaba la leh bad na ka bynta kane yn pynkylla ia ki kyndon bad kane kan ailad ia ki nongseng kam ka jylla bad ia ki riewshimet ka jylla kiba don ia ka jingthrang ban pyniaid ia ka kyiad pyrsi ban pynmih ia ka bad ban pynwan dur ia ka ha ka lynti kaba biang bad ka rukom treikam kaba la mynjur da ka kynhun myntri” ula ong.
U Conrad Sangma ula pyntip ruh ba ka kynhun myntri ka la pynduna ia ka kyrdan jong ki Bonded Warehouses na ka 3 tylli sha ka 2 tylli ban pynsuk ia ka rukom khaii pateng.
Kine ki ar tylli ki kyrdan ki kynthup ia ka jingioh kamai kaba T.20 Klur shaneng ha ka shi snem bad kiba kamai hapoh jong ka T.20 Klur shapoh ha ka shi snem.
Nalor kane, ia ka Wine Policy la pyniar da kaba kynthup lang ia ki tynrai dieng, sying, ki tynrai jong ki jingthung, ki tynrai jong ki syntiew ki skud bad ka ngap kum ki bynta jong ka jingshna ia ka waiñ ha ki iing” ong u Conrad.
“Baroh ia kine kiei kiei lada pynkylla sha ka waiñ kaba la shna ha iing, ia kine ki mar yn lah ban kynthup ia ki kum ki Home Made Wine Policy,” la bynrap u Sangma.
 bad ban pynduna noh ia ka kyrdan jong ki Bonded Warehouses na ka lai tylli sha ka ar tylli.){kind=link}