Shillong, Nailar 07: Ka kynhun Myntri Sorkar ha ka sngi Palei, ka la mynjur ia ka polisi bad iaka ain ban ai wai ia ki kali arshaka bad saw kali sha ki nongjngohkai pyrthei bad ki riew shimet, da kaba thmu ban tehkyndon ia ka rukom aiwai bad pynthikna ia ka jingshngain jong ki nongjngohkai pyrthei.
“Mynta ka sngi ngi la mynjur 2 tylli ki polisy kata kawei na ka bynta ki arshaka bad kawei na ka bynta ki kali” la ong u Myntri Rangbah ka Jylla u Conrad K Sangma.
Ka polisi ka kdew ba ki riew shimet bad ki Agency kiba ai wai kali sha ki nongjngohkai pyrthei ki donkam ban pynrung kyrteng ha ka tnat Transport haba bynrap ba katei ka rukom treikam ka thmu ban pynthikna ia ka jingshngain jong ki nongjngohkai pyrthei da kaba teh kyndon ia ka kam ai wai kali, kaba la treikam khlem da peit bniah haduh mynta.
